Ташкентаас олимпийн эрх, багийн түрүүтэй ирлээ

2014-10-20 10:08:23

Энэ намар манай жүдочид Узбекстаны нийслэл Ташкент хотыг хоёронтоо зорилоо. Хамгийн сүүлд буюу энэ сарын 18-ныг хүртэл үргэлжилсэн "Рио-2016" олимпийн эрхийн оноо олгох Олон улсын жүдо бөхийн холбооны Гранпри тэмцээнд оролцоод ирлээ. Тэд эрхийн оноогоо цуглуулаад зогсохгүй багийн дүнгээр тэргүүлсэн амжилтаар эх орондоо ирж байна.

Рио де Жанейрогийн олимпийн эрхийн оноо олгох тус тэмцээнд 42 орны эрэгтэй 142, эмэгтэй 140 нийт 282 тамирчин өрсөлдсөн. Харин манай улсаас "Ташкент Гранпри-2014" тэмцээнд эрэгтэй 10, эмэгтэй дөрвөн бөх оролцсоноос гурван алт, гурван мөнгө, дөрвөн хүрэл медаль хүртэж, багийн дүнгээр тэргүүллээ.

Эрэгтэйчүүдийн 60 кг-д ОУХМ Д.Амартүвшин, 73 кг-д Гавьяат тамирчин С.Ням-Очир, +100 кг-д ОУХМ Б.Тэмүүлэн нар алт, 66 кг-д ОУХМ Д.Алтансүх, 73 кг-д Хөдөлмөрийн баатар, Гавьяат тамирчин Х.Цагаанбаатар, эмэгтэйчүүдийн 52 кг-д ОУХМ А.Цолмон нар мөнгө, эрэгтэйчүүдийн 60 кг-д ОУХМ Г.Хэрлэн, 81 кг-д ОУХМ О.Ууганбаатар, эмэгтэйчүүдийн 48 кг-д ОУХМ Г.Отгонцэцэг, 63 кг-д ОУХМ Ц.Мөнхзаяа нар хүрэл медаль хүртлээ.

Гранпри тэмцээний 73 кг жингийн алтан медалийн төлөө Монголын хоёр шилдэг бөх шалгарснаас С.Ням-Очир ялалт байгуулж, түрүүллээ. Тус жинд олимпийн хүрэл, дэлхийн аварга Хөдөлмөрийн баатар, Гавьяат тамирчин Х.Цагаанбаатар Итали, Узбекстан, ОХУ-ын бөхчүүдийг ялсан бол олимпийн хүрэл медальт Гавьяат тамирчин С.Ням-Очир Турк, Франц болон ОХУ-ын бөхчүүдийг ялснаар нүүр тулсан билээ.

Нийтэлсэн: Б.Батхолбоо

	Ташкентаас олимпийн эрх, багийн түрүүтэй ирлээ
Үзсэн: 1119	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.