Монголын шатарчид тэр тусмаа өсвөрийн оюуны спортын тамирчид дэлхийн хэмжээний томоохон тэмцээнүүдэд амжилттай оролцож байгаа билээ. Тэгвэл энэ онд өсвөрийн шатарчид тив, дэлхийд оюун ухаанаа уралдуулж 23 медалийг авчээ. Хамгийн сүүлд Дэлхийн аварга шалгаруулах тэмцээнээс Д.Мөнхзул алтан медаль, Е.Төгстөмөр нар мөнгөн медал хүртлээ. Эдгээр амжилтуудыг МШХолбооноос үнэлэн холбооны нарийн бичгийн дарга Х.Эрдэнэдорж, МУГДасгалжуулагч ОУ-ын Мастер П.Жигжидсүрэн, Гавьяат тамирчин, их мастер Б.Хатанбаатар, их мастер Д.Шаравдорж тэргүүтэй удирдлагууд, багш дасгалжуулагчид өсвөрийн тамирчдаа хүлээн авч баяр хүргэлээ.

Шатрыг их гүрний оюун ухааны спорт гэдэг. ОХУ, БНХАУ, Энэтхэг, АНУ гээд олон зуун сая хүн амтай их гүрнүүд шатрын хоймрыг эзэгнэдэг. Тэгвэл гурван сая хүнтэй Монголын өсвөрийн шатарчид дэлхийн дэвжээнд цахиур хагалах болсонд их гүрний шатарчид гайхан ажиглах болжээ. Нэн ялангуяа манай өсвөрийн шатарчид дэлхийн шилдэг шатарчдын тоонд зүй ёсоор тооцогдох болов.