Л.Эрдэнэчимэг гишүүн Азийн эмэгтэй парламентчдын хуралдаанд оролцож байна

2014-10-21 09:01:10

УИХ-ын гишүүн Л.Эрдэнэчимэг НҮБ-ын эмэгтэйчүүдийн байгууллага болон Конрад Аденауэрын сангаас хамтран Сингапур улсад зохион байгуулж буй Азийн эмэгтэй парламентчдын хуралдаанд оролцож байна.

Тэрээр энэхүү хуралдаанд УИХ дахь эмэгтэй гишүүдийн албан бус бүлгийг төлөөлөн оролцож байгаа бөгөөд “Монголын эмэгтэйчүүдийн улс төрд эзлэх байр суурь” сэдвээр илтгэл тавилаа. Хуралдаанд Азийн 11 орны төлөөлөгч оролцож бүс нутагтаа эмэгтэй парламентчдын бүлэг байгуулах асуудлыг хэлэлцэж байгаа юм. Бүсийн хэмжээнд бүлэг байгуулснаар бүс нутагт сүлжээ болон өргөжиж байгаа хүний наймаа зэрэг гэмт хэрэгтэй хамтран тэмцэх, золиос болж буй эмэгтэйчүүдийн эрхийг хамгаалах, мөн энэ чиглэлээр аль нэг улсад хэрэгжиж буй сайн туршлагыг өөрийн улс оронд авч хэрэгжүүлэх зэргээр хамтран ажиллах боломж бий болно гэж үзлээ.

Мөн хуралдааны үеэр Л.Эрдэнэчимэг гишүүн Малайзын парламентын эмэгтэй гишүүдтэй уулзаж Ш.Алтантуяагийн хэргийн асуудлаар хамтран ажиллах талаар ярилцсан байна. Азийн улс орнуудад тулгарч буй том бэрхшээл бол “авлига” гэдгийг хуралдаанд оролцсон нийт төлөөлөгчид хүлээн зөвшөөрч эмэгтэйчүүд улс төрд олноор орж ирснээр төрийн тунгалаг байдлыг нэмэгдүүлж, авлигатай тэмцэж чадна гэдэгт санал нэгдэв.

Нийтэлсэн: О.Энхмаа

	Л.Эрдэнэчимэг гишүүн Азийн эмэгтэй парламентчдын хуралдаанд оролцож байна
Үзсэн: 881	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.