Түүнчлэн Ерөнхий сайд, Үндэсний Аюулгүй байдлын зөвлөлийн даргын гарын үсгийг хуурамчаар үйлдсэн нь ноцтой асуудал гээд ийм ёс зүйгүй, увайгүй улс төр өмнө нь Монголын төрд гарч байгаагүй гэлээ.

 

Мөн өнгөрсөн баасан гарагт болсон УИХ-ын гишүүдийн өмнөөс худал мессеж бичиж тараасан үйл явдлыг гадаад улсаас үйлдсэн нь бүр ч ноцтой гээд энэ асуудлыг яаралтай шийдэхийг ТЕГ-аас шаардсан байна. Түүнчлэн энэ хэрэгтэй холбоотойгоор байнгын хороон дээр ажлын хэсэг байгуулах талаар яригдаж байгаа гэдгийг хэллээ.

Мөн “АН-ын 15 гишүүн Ерөнхий сайд Н.Алтанхуягийг огцруулахаар гарын үсгээ зуржээ” гэх мэдээлэл хэвлэл мэдээллийн хэрэгслээр тараад байгаа. Энэ асуудлыг тус бүлэг өнөөдрийн хуралдаанаар мөн авч хэлэлцсэн байна. Бүлгийн хуралдааны үеэр УИХ-ын гишүүн Ц.Болор “Би гарын үсэг зураагүй. Зураагүй байхад зурсан гээд бичсэн байгаа зүйлийг шалгаж өгнө үү” гэх хүсэлтийг бүлгийн даргадаа тавьжээ. Мөн Ерөнхий сайд, Засгийн газрыг огцруулна гэсэн яриа гаргаж байгаа гишүүддээ “Ерөнхий сайдыг огцруулах кноп дарах нь АН-ыг буудахтай адил” гэж  сануулж байгаа гэлээ.

Үүнээс гадна ирэх 2015 оны төсвийн төслийн талаар дахин хэлэлцэж үзэх нь зүйтэй хэмээн үзэж ажлын хэсэг гаргахаар болсон байна. Учир нь ирэх оны төсвийн тухай хуульд нийслэл болон аймаг орон нутагт зарим төсвийн эрх мэдлийг шилжүүлэхээр зохицуулсан байсан юм. Гэвч нийслэлийн Засаг дарга болон зарим орон нутгийн удирдлагууд үүнийг эсэргүүцэж байгаа тул ийнхүү дахин хэлэлцэхээр болжээ.

 

Түүнчлэн ирэх онд төсвийн алдагдалгүй ажиллахын тулд сая баталсан төмөр замын тээврийн бодлогодоо уялдуудан ажлаа цаашид үргэлжлүүлэх,  “Тавантолгой”-н менежментийн хувьчлалыг түргэвчлэх мөн Оюутолгойн далд уурхайн асуудлыг яаравчлах хэрэгтэй гэлээ.