Өнгөрсөн долоо хоногт УИХ-ын зарим гишүүний утасны дугаарыг ашиглан “Мобиком" корпораци, "Юнител" группийн үүрэн телефоны сүлжээгээр олон нийтэд мэдээлэл тараасан хэрэг гарсан. Уг хэргийг УИХ-ын тухай хуулийн 34 дүгээр зүйлийн 34.6 дахь хэсэгт “Гишүүний харилцуур утас болон бусад тусгай хэрэглээний холбооны хэрэгсэл төрийн хамгаалалтад байх бөгөөд бүрэн эрхээ хэрэгжүүлэх, үйл ажиллагаагаа явуулахтай холбогдсон шуудан, захидал харилцааны болон мэдээллийн нууцыг задруулахыг хориглоно” гэсэн заалтыг зөрчсөн гэж УИХ-аас үзэж байгаа юм. Тиймээс дээрх хуулийн хэрэгжилтийг шалгах ажлыг Тусгай хяналтын дэд хороонд үүрэг болгохоор тогтоолын төсөлд тусгажээ. Мөн байнгын хорооны дэргэд ажлын хэсэг байгуулах санал гаргасан юм. Үүний дараа өнөөдөр УИХ-ын Аюулгүй байдал, гадаад бодлогын байнгын хорооны хуралдаанаар ажлын хэсэг байгуулах тухай тогтоолын төслийг хэлэлцлээ.