Нийтдээ гурван өдөр үргэлжлэх уг зөвлөлгөөнийг нээж Ерөнхий сайд Н.Алтанхуяг үг хэлсэн юм. Нээлттэй, ил тод, хариуцлагатай засаглалыг дэмжих, энэ чиглэлээр улс орнуудын Засгийн газруудад тодорхой үүрэг хүлээлгэх зорилготой Нээлттэй Засгийн түншлэл анх 2011 онд байгуулагдсан бөгөөд эдүгээ 65 орныг эгнээндээ багтаагаад байгаа аж. Манай улсын Засгийн газар тус Нээлттэй Засгийн түншлэлийн тунхаглалыг хүлээн зөвшөөрч нэгдэн орсон бөгөөд Үйл ажиллагааны Үндэсний төлөвлөгөөгөө энэ оны долоодугаар сард батлан гаргажээ.

 

Уг тунхаглалын хүрээнд АНУ-ын Олон Улсын Хөгжлийн агентлагийн санхүүжилтээр АНУ-ын Азийн сан “Засаглал, ил тод байдлыг дэмжих” төсөл, Мерси Кор байгууллага “Орон нутгийн хариуцлагатай засаглалын төлөөх иргэдийн идэвхтэй түншлэл ба иргэдийн оролцоо” төслүүдийг хэрэгжүүлсэн байна. Өнөөдрийн зөвлөлгөөнөөр уг төслийн үр дүн болоод туршлагуудыг сум, дүүргийн засаг нартай хуваалцаж, санал бодлоо солилцох юм байна. Нийтдээ 2.5 жилийн хугацаанд хэрэгжиж буй дээрх төслүүд ирэх 12 дугаар сард дуусах ажээ.