Монголын жүдогийн холбооны Ерөнхийлөгч Х.Баттулга “Спортын өнгө” сонинд өгсөн ярилцлагадаа Б.Сугаржаргалыг шигшээ багаас хассан, жүдогоор барилдуулахгүй хэмээн ярилцлага өгсөн байна. Учир нь үндэсний бөхийн начин цолтон, жүдогийн шигшээ багийн тамирчин Б.Сугаржаргал улсын наадмаар Монголын үндэсний бөхийн хөлийн цэц Д.Сэрээтэр начинтай муудалцаж, өвгөн бөхийг хэл амаар доромжилсон, нударсан гэх асуудал үүсгэсэн юм. Тухайн үед түүний энэ үйлдлийг Монголын жүдогийн холбооны Ерөнхийлөгч Х.Баттулга илт буруутгаж, хатуухан шийтгэл онооно хэмээсэн.

Харин Б.Сугаржаргал начин өөрийг нь шигшээ багаас хассаныг мэдээгүй байсан ба тэрбээр “Одоохондоо надад холбооноос тэгсэн, ингэсэн гэсэн юм хэлээгүй байна. Би “Женко” дэвжээндээ байгаа шүү дээ. Томоохон тэмцээн уралдаанд оролцохгүй байгаа болохоос биш. Миний хувьд сүүлийн нэг жилд жүдогоор барилдсангүй. Тиймээс иймэрхүү хэл ам гарах болсон байлгүй. Би жүдогийнхонтойгоо байнга бэлтгэл хийж байна” хэмээн ярьжээ.