Хонгконгт Монголын хөрөнгө оруулалтын чуулга уулзалт эхэллээ

Шуурхай:

Хонгконгт Монголын хөрөнгө оруулалтын чуулга уулзалт эхэллээ

2014-11-19 08:52:41

Олон улсын санхүүгийн төв Хонгконгт жилд ганцхан удаа болдог Монголын хөрөнгө оруулалтын ээлжит чуулга уулзалт арваннэгдүгээр сарын 18-нд Хонгконгийн Шератон буудалд эхэллээ. Монголын эдийн засагт гадаадын шууд хөрөнгө оруулалтын идэвхжил нэн чухал байгаа эгзэгтэй цаг мөчид, манай шинэ Засгийн газар байгуулагдахаар улс төрийн яриа хэлцэл ид явагдаж байгаа өдрүүдэд олон улсын болон Ази, Номхон далайн бүс нутгийн хөрөнгө оруулагчдын анхаарлыг ихээхэн татаж, тухайн жилд тэдний Монголд чиглэсэн үйл ажиллагаа, хандлагыг тодорхойлоход чухал үүрэг гүйцэтгэдэг томоохон арга хэмжээ ийнхүү нээгдэж байна.

Энэ удаагийн Монголын хөрөнгө оруулалтын чуулга уулзалтад Монгол банкны ерөнхийлөгч Н.Золжаргал, Эдийн засгийн хөгжлийн дэд сайд асан О.Чулуунбат, Монгол Улсаас БНХАУ-д суугаа Онц бөгөөд Бүрэн эрхт Элчин сайд Ц.Сүхбаатар, Хөрөнгө оруулалтын газрын дарга С.Жавхланбаатар нарын албаны хүмүүс болон манай улстай хамтран ажилладаг, Монголыг сонирхдог, манайд үйл ажиллагаа явуулах боломжийг эрэлхийлж байгаа гадаадын бизнесменүүд, хөрөнгө оруулагчид олноор оролцож байна.

Түүнчлэн Худалдаа хөгжлийн банк, Монголын бизнесийн зөвлөл, Эрдэнэс тавантолгой, Магнай трэйд зэрэг Монголын бизнесийн байгууллагуудын төлөөлөл хүрэлцэн иржээ. Хоёр өдөр үргэлжлэх хөрөнгө оруулалтын чуулга уулзалтаар Монголын макро эдийн засаг, санхүүгийн сектор, хөрөнгө оруулалтын орчны төлөв байдалд дүн шинжилгээ хийж, хөрөнгө оруулагчдын итгэлийг сэргээх, эдийн засгийг идэвхжүүлэх арга замуудыг олон талаас нь хэлэлцэж байна.

Чуулга уулзалтын үеэр Хонгконгт шинээр байгуулагдсан Монголын худалдааны танхимын үйл ажиллагааны нээлтийн ёслол боллоо. Монгол, Хонгконг хоорондын болон бүс нутгийн бизнес, хөрөнгө оруулалтыг хөхиүлэн дэмжих үндсэн зорилготой Хонгконг дахь Монголын худалдааны танхимыг энд 2 жил орчим идэвхтэй үйл ажиллагаа явуулсан Монгол клубын үүсгэн санаачлагчид байгуулан өнгөрсөн 5 дугаар сард Хонгконгт албан ёсоор бүртгүүлсэн юм гэж Хонконг дахь Монгол Улсын Ерөнхий консулын газраас мэдээлэв.

Нийтэлсэн: Гадаад харилцааны яам

	Хонгконгт Монголын хөрөнгө оруулалтын чуулга уулзалт эхэллээ
Үзсэн: 915	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.