Монгол, Францын Засгийн газрын II хуралдаан болно

2014-12-02 13:40:00

Монгол Улсын гуравдагч хөрш болох Франц улсад Засгийн газрын бодлогын талаар мэдээлэл өгөх, хоёр орны харилцааг идэвхжүүлэх, худалдааны эргэлт, хөрөнгө оруулалтыг нэмэгдүүлэх чиглэлээр ажиллах Засгийн газар хоорондын ажлын хэсэг 2013 онд байгуулагдсан юм. Ажлын хэсгийн анхдугаар хуралдаан өнгөрсөн онд Парис хотноо болж, II хуралдааныг Улаанбаатар хотноо зохион байгуулахаар тохирсон байна.

Товын дагуу энэ сарын 8-нд Монгол, Францын Засгийн газар хоорондын ажлын хэсгийн II хуралдааныг Улаанбаатар хотноо зохион байгуулна. Үүнтэй холбогдуулан хуралдаанд Монголын талын баримтлах удирдамжийг баталж, бэлтгэл ажлыг Гадаад харилцаа, эдийн засгийн хамтын ажиллагааны дэд сайд Д.Ганхуягт хариуцууллаа. Хуралдаанаар хөдөө аж ахуй, дэд бүтэц, эрчим хүч, хүрээлэн буй орчин, соёлын салбарын харилцааны тодорхой асуудлуудаар санал солилцох юм.

Ажлын хэсгийн II хуралдааныг Францын Гадаад худалдаа, аялал жуулчлал, хилийн чанад дахь Францын иргэдийн асуудал эрхэлсэн Төрийн сайд Матиас Фэкл даргалахын сацуу Монгол Улсад ажлын айлчлал хийж, Монгол Улсын Ерөнхий сайд, Гадаад харилцаа, эдийн засгийн хамтын ажиллагаа, Үйлдвэр, хөдөө аж ахуй болон Уул уурхай, эрчим хүчний сайдуудтай уулзах хүсэлт гаргаад байна.

Нийтэлсэн: О.Энхмаа

	Монгол, Францын Засгийн газрын II хуралдаан болно
Үзсэн: 1464	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.