Аваргуудын лигийн хасагдах шатны сугалаа явагдаж дууслаа. Сугалааны үр дүнд "Манчестер Сити", "Барселона" клубууд хоёр дахь улирлаа дараалан хоорондоо хүч үзэхээр болсон. Давид Луйз "ПСЖ" клубын хамтаар "Стэмфорд бриджи"-д эргэн ирэхээр боллоо. "Челси"-гийн дасгалжуулагч Жозе Моуриньо ч "ПСЖ-тэй таарчихмаар байна" хэмээн хэлээд байсан юм.

Хасагдах шатанд үргэлж л чанга багтай таардаг "Арсенал"-ын дасгалжуулагч Арсен Венгер өнгөрсөн амралтын өдрөөр сүм рүү явж залбирна гэж байсан нь үр дүнгээ өгсөн бололтой. Учир нь тэрээр "Арсенал"-ынхаа хамтаар өөрийн хуучин баг "Монако"-той таарсан юм. Харин "Реал Мадрид" дахиад л "Шальке"-тай таарсан бол "Фаворит"-уудын нэг "Байерн Мюнхэн" Украйны "Шахтёр"-той тоглохоор боллоо. Мөн Италийн аварга "Ювентүс" Германы "Боруссиа Дортмунд"-тай, Базель Портотой тус тус учраа таарлаа.

Хасагдах шатны эхний тоглолтууд хоёрдугаар сарын 17, 18 & 24, 25-нд явагдах бол хариу тоглолтууд гуравдугаар сарын 10,11 & 17, 18-ны өдрүүдэд тус тус явагдах хуваарьтай байна.