УИХ-ын гишүүдийн унааны зардлаас 600 сая төгрөг хэмнэх боломжтой гэв

Шуурхай:

УИХ-ын гишүүдийн унааны зардлаас 600 сая төгрөг хэмнэх боломжтой гэв

2015-01-15 13:13:22

УИХ дахь МАН-ын бүлгийн өчигдрийн хуралдаанаар хэлэлцсэн асуудлаар УИХ дахь МАН-ын бүлгийн дарга С.Бямбацогт, УИХ-ын гишүүн Б.Чойжилсүрэн, Ж.Батсуурь, Д.Дэмбэрэл нар өнөөдөр мэдээлэл өглөө. УИХ дахь МАН-ын бүлэг эдийн засгийн хямралыг даван туулах асуудлыг цогц байдлаар авч үзэх шаардлагатай гэж үзжээ. Энэ талаар УИХ дахь МАН-ын бүлгийн дарга С.Бямбацогт “Манай бүлэг өнгөрсөн хоёр жилийн хугацаанд эдийн засаг хүндэрч байгааг эрх баригчдад сануулж яаралтай арга хэмжээ авахыг шаардсаар ирсэн. Гэвч Н.Алтанхуягийн Засгийн газар үл тоомсорлож, бодит үнэнийг нууж ирсэн. Үүний уршгаар эдийн засаг төсөөлж байснаас ч илүү өвчилснийг илтгэх тоо баримтууд МАН засагт орсноор ил болж, цаг алдалгүй дараагийн алхмыг авах шаардлага үүслээ” хэмээсэн юм. Нэгэнт нүүрлэсэн хямралыг зөвхөн 2015 оны төсвийн тодотголын хүрээнд шийдэх боломжгүй учир эдийн засагт онцгой, стандарт бус арга хэмжээ авах зайлшгүй шаардлага бий болсныг тэрээр мэдэгдлээ. Тиймээс МАН-ын бүлэг эдийн засгийн хямралыг даван туулах санал боловсруулах ажлын хэсгийг УИХ-ын гишүүн Ч.Хүрэлбаатараар ахлуулан байгуулжээ.

Хямралыг даван туулах богино хугацааны төлөвлөгөө боловсруулж УИХ-аар батлуулах шаардлагыг шийдлийн Засгийн газрын тэргүүн Ч.Сайханбилэгт удаа дараа тавьж байгаа ч энэ ажил удаашралтай явагдаж байгаа учраас МАН-ын бүлэг ийм шийдвэр гаргасан аж. Мөн МАН-ын бүлгийн 26 гишүүн унааны зардлаасаа татгалзаж, хэмнэлтийг өөрсдөөсөө эхлэх уриалга гаргаснаа энэ үеэр мэдэгдлээ. Энэхүү уриалгыг УИХ-ын 76 гишүүн дэмжвэл нийтдээ 600 гаруй сая төгрөгийг төсвийн зардлаас танах боломж бүрдэх юм байна. Засгийн газар хүүхдийн мөнгийг ялгавартай олгох, одонтой эхчүүд, жирэмсэн болон хөхүүл эхчүүдийн мөнгөн тэтгэмжийг танах, цалин тэтгэврийг нэмэхгүй байх саналыг төсвийн тодотголоор оруулж ирсэн. Харин МАН-ын бүлэг цалин тэтгэврийг нэмэгдүүлэх, хүүхдийн мөнгө, одонтой эхчүүд, жирэмсэн болон хөхүүл эхчүүдийн мөнгөн тэтгэмжийг танаж хасахгүй олгох ёстой гэсэн өмнөх байр суурин дээрээ одоо ч гэсэн хатуу зогсож буйгаа мэдэгдэв. Эдийн засгийн хямралыг ард түмний түрийвчнээс төлүүлэх бус зардлаа танах байдлаар "хэмнэлтийн горимд" орох ёстой. Ингэхдээ баялаг бүтээгчид, ард иргэдийн нуруун дээрх татварын ачааллыг нэмэгдүүлж болохгүй гэж МАН-ын бүлэг үзэж байгаа аж.

Мэдээлэл хийсэн гишүүд “Өрийн хэмжээг нэмэгдүүлэхгүй гэсэн байр суурийг анхнаасаа баримталж байсан. АН-тай хамтран ажиллах гэрээнд ч энэ тухай тохиролцсон. Уг байр сууриа Ерөнхий сайд Ч.Сайханбилэгийн өргөн мэдүүлсэн Төсвийн тогтвортой байдлын тухай хуульд өөрчлөлт оруулж өрийн таазыг 70 хувьд хүргэх хуулийн төслийн хэлэлцүүлгийн явцад дахин нотолж, Засгийн газарт хуулийн төслийг буцаасан юм. Одоогийн байдлаар өрийн босго 58.2 хувьд хүрч Төсвийн тогтвортой байдлын тухай хуулийг зөрчсөн байна. Өмнөх Засгийн газар хууль зөрчиж өрийн босгыг энэ хэмжээнд хүргэснээ ард түмнээсээ нууж ирсэн. Иймд хуульд заасан хязгаараас хэдийнэ давсан өрийн босгыг бодит төвшинд нь тогтоон хуулийн зөрчлийг арилгах, улсын өрийн хэмжээг үе шаттай бууруулах ёстой гэдэгт санал нэгдлээ” хэмээлээ.

Түүнчлэн өнгөрсөн хоёр жилийн хугацаанд төсвөөс гадуур зарцуулсан Хөгжлийн банкны хөрөнгийн зарцуулалтыг шалгах ажлын хэсгийг Эдийн засгийн байнгын хорооноос байгуулсан байна. УИХ-ын хараа хяналтаас гадуур зарцуулагдаж байгаа "Чингис", "Самурай" бонд, үнэ тогтворжуулах хөтөлбөрийн хөрөнгийн зарцуулалтад хяналт шалгалт хийх, юунд ямар үр дүнтэй зарцуулсан бодит мэдээллийг ард иргэдэд хүргэх ёстой, эдийн засгийн өнөөгийн байдалд бодит дүн шинжилгээ хийж дараагийн алхмуудыг тодорхойлох ёстой гэсэн байр суурийг дахин илэрхийллээ.

Нийтэлсэн: О.Энхмаа

	УИХ-ын гишүүдийн унааны зардлаас 600 сая төгрөг хэмнэх боломжтой гэв
Үзсэн: 1057	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.