Өнөө өглөө Төсвийн байнгын хороо хуралдаж уг хуульд өөрчлөлт оруулж, өрийн таазыг ДНБ-ий 60 хувьд хүргэх хуулийн төслийг хэлэлцэх үеэр МАН-ын бүлгээс гаргасан өрийн таазыг 58.3 хувиас хэтрүүлэхгүй байх санал дэмжигдээгүй юм. Гэвч үргэлжлүүлэн хуралдсан чуулганы нэгдсэн хуралдааны анхны хэлэлцүүлгээр гишүүдийн олонхийн саналаар өрийн таазыг 58.3 хувьд нь барихыг дэмжиж хуулийн төслийг Төсвийн байнгын хороонд шилжүүлсэн.

 

Харин байнгын хороо чуулганы үдээс өмнөх нэгдсэн хуралдааны завсарлагаар хуралдаж, хуулийн төслийн эцсийн хэлэлцүүлгийг хийж чуулганаас гаргасан шийдвэрийг дэмжсэн юм.

 

Энэ талаарх санал дүгнэлтийг чуулганы үдээс хойших хуралдаанд УИХ-ын гишүүн Д.Ганхуяг танилцуулсан юм. Байнгын хорооны танилцуулгатай холбогдуулан УИХ-ын гишүүн Ж.Батзандан, Ц.Нямдорж нар байнгын хорооны даргаас асуулт асууж тодруулсан. Төсвийн тогтвортой байдлын тухай хуульд өөрчлөлт оруулах асуудлыг чуулганы тухайн өдрийн нэгдсэн хуралдаанд оролцсон гишүүдийн гуравны хоёроос доошгүйн саналаар шийдвэрлэх хуулийн заалттай. Ингээд байнгын хорооны саналаар Төсвийн тогтвортой байдлын тухай хуульд нэмэлт, өөрчлөлт оруулах тухай хуулийг батлах санал хураалт явуулахад чуулганы нэгдсэн хуралдаанд оролцсон 41 гишүүний 37 нь буюу 90.2 хувь нь дэмжсэнээр хуулийн төсөл батлагдлаа. Ингэснээр манай улсын нийт өрийн хэмжээг ДНБ-ий 58.3 хувиас хэтрүүлэхгүй байхаар болж байгаа юм.

 

Мөн хууль батлагдсанаар Төсвийн тогтвортой байдлын тухай хуульд заасан өрийн тусгай шаардлагыг хангахын тулд улсын өрийн ДНБ-д эзлэх хувь хэмжээг үе шаттайгаар бууруулан 2018 оны төсвийн жилд хуульд заасан ДНБ-ий 40 хувьд хүргэж бууруулах эрх зүйн зохицуулалт бүрдэж байна.