УИХ-ын нэгдсэн чуулганаар Эдийн засгийн өршөөлийн тухай хуулийг хэлэлцэж байгаа. Тус хуулийн төсөлтэй хамт Гэмт хэргийн өршөөлийн тухай хуулийг хэлэлцэх саналыг удаа дараа тавьсан ч хүлээж аваагүй байна. Энэхүү хуулийн төсөл олон нийтийн дунд хүлээлттэй байгаа хэдий ч энэ намрын чуулганаар хэлэлцэж амжихгүй юм байна. Тиймээс ирэх хаврын чуулганаар хэлэлцүүлэх үү,  үгүй юу гэдгийг бүлгийн хурлаараа ярилцсан гэж тус бүлгийн дарга Н.Батцэрэг хэлсэн юм.

 

Түүнчлэн энэ долоо хоногт анхны хэлэлцүүлгийг нь хийхээр болсон Урт нэртэй хуулинд нэмэлт өөрчлөлт оруулах хуулийн төсөлд өмнөхөөсөө дордуулсан заалт орж ирвэл дэмжихгүй гэдэг байр суурийг илэрхийлнэ гэдгийг бүлгийн дэд дарга З.Баянсэлэнгэ хэллээ. Үүнээс гадна тус бүлэг Засгийн газар болон яамдууд мэргэшсэн төрийн албан хаагчийг ихээр халж байгааг эсэргүүцэж байгаа гэв. Тиймээс төрийн албан хаагчдыг халахгүй байх талаар Засгийн газарт мэдэгдэл хүргүүлнэ гэлээ.