Одоогоор зээлийн батлан даалтын сангийн эх үүсвэр нь таван тэрбум төгрөг байгаа. Үүнийг 60 сая доллараар нэмэгдүүлэх төслийг Зээлийн батлан даалтын сан Азийн хөгжлийн банктай хамтран хэрэгжүүлж байгаа ажээ. Азийн хөгжлийн банк зөвхөн Монголд ч биш Азийн улс орнуудад зээлийн батлан даалтын сангийн тогтолцоог нь дэмжих, Жижиг, дунд үйлдвэрийн санхүүжилтийг нэмэгдүүлэх, санхүүжилт авах боломжийг нь хангах, чиглэлээр олон төсөл хөтөлбөр хэрэгжүүлдэг байна. Энэ талаар Азийн хөгжлийн банкны Зүүн азийн бүс нутаг хариуцсан мэргэжилтэн Жиакомо Жианетто “Бид яг ийм төрлийн төслийг Энэтхэг, Казакстан улсуудад хэрэгжүүлж байсан. Зөвхөн санг нь дэмжихээс гадна жижиг, дунд бизнес эрхлэгчдийн чадавхийг нь нэмэгдүүлэх чиглэлээр олон төсөл хөтөлбөр хэрэгжүүлж байсан” хэмээн ярилаа. Энэ төслийг хэрэгжүүлэх асуудал эхлээд УИХ-аар хэлэлцэгдэнэ. Хэрэв УИХ-аар дэмжигдвэл энэ ондоо багтааж эхлүүлж болох юм байна.

 

Манай улсын зээлийн батлан даалтын тогтолцоонд бас засаж сайжруулах зүйл байгааг хэлэлцүүлгийн үеэр хэлж байсан. Тухайлбал, иргэд зээлийн батлан даалтад хамрагдахын тулд эхлээд арилжааны банкинд хандаад, арилжааны банкнаас энэ төсөлд батлан даалт хэрэгтэй байна гэж үзсэн нөхцөлд батлан даалтыг гаргадаг байна. Энэ нь их удаашралтай үйл явц болдог байна. Харин бусад орнууд үнэхээр ач холбогдолтой, үр дүнтэй төсөл байх юм бол шууд батлан даалт гаргадаг тогтолцоотой байдаг. Манайд ийм хуулийн зохицуулалт байхгүй. Тиймээс Зээлийн батлан даалтын сангийн тухай хуулиа эргэж харах хэрэгтэй гэж зарим албаны хүн хэлж байсан юм.