Ассошэйтэд прессээс мэдээлж буйгаар Би Пигийнхэн Алабама, Флорида, Миссисипи, Луизиана, Техас муж болон орон нутгийн эрх баригч байгууллагын 400 гаруй төлөөлөгчийн хохирлыг барагдуулах тохиролцоог байгуулсан байна. Тус компани нийт 18.7 тэрбум долларын торгууль хүлээхээр болж байгаагийн дотор цэвэр усны тухай Холбооны хуулийн заалтыг зөрчсөний торгууль болох 5.5 тэрбум америк долларыг 15 жилийн хугацаанд төлөхөөр болж байгаа аж. Түүнчлэн тус компани 15 жилийн дотор холбооны Засгийн газар болон 5 мужид 7.1 тэрбумийг нэмээд 4.9 тэрбумийг эдийн засгийн болон санал гомдолтой холбоотой бусад асуудлыг зохицуулахад зориулан төлөхөөр болж байна.

 

 

Энэ талаар Флорида мужийн Ерөнхий прокурор Пэм Бонди “Манай мужийнхан энэ түүхэн яриа хэлэлцээнд тэргүүлэн оролцоод зогсоогүй Флоридагийн ард түмний өмнөөс тохиролцоонд хүрч чадсаныг мэдээлж байгаагаараа би бахархаж байна. Таван жилийн өмнө энэ осол бүх үндэстнийг цочроож байсан билээ. Байгаль экологи, эдийн засгийн хувьд ихээхэн хохирол амсаад зогсохгүй энэ осол 11 хүний аминд хүрсэн. Түүнээс хойш таван жилийн дараа бид хамтын шийдэлд хүрч экологийн болон эдийн засгийн хүчтэй давалгаа үүсэхээс сэргийлж чадлаа. Бритиш Петролиум Флорида мужид 3.2 тэрбум долларын нөхөн төлбөр олгохоор боллоо“ гэсэн юм.

 

 

Үүний зэрэгцээ Би Пигийнхэн нийт 232 сая долларын сан байгуулахыг хүлээн зөвшөөрчээ. Энэ мэтчилэн Мексикийн буланд учруулсан байгаль экологийн сүйрлийн үр дагаврыг арилгахын тулд тус компани нийт 53.8 тэрбум доллар зарцуулахаар болж байна. Би Пигийн Мексикийн булан дахь Макондо цооногийг өрөмдөх үеэр дэлбэрэлт болж 11 хүн амиа алдсаны зэрэгцээ нефть алдагдаж эхэлснийг бүтэн гурван сарын дараа л зогсоож чадсан юм. Энэ хугацаанд нийтдээ 4.9 сая баррель нефть алдагдсан билээ.