Эдүгээ 21 дүгээр зууны арван тав дахь онд Монгол Улсад моторт тээврийн үүсэл, замнал, хөгжлийн 90 жилийн ой тохиож байна. 1925 оны долоодугаар сарын 15-нд “Монгол Улсын тээх нэвтрүүлэх газар” хэмээх анхны механикжсан тээврийн байгууллага байгуулагдаж байжээ.

Сүхбаатар аймгийн хувьд 1949 оны Төв хороо, Сайд нарын зөвлөлийн 153-35 тоот тогтоолоор “Газ-51” маркийн зургаан автомашинтай 20 гаруй ажилчин, албан хаагчтай “Авто өртөө” байгуулагдсан тэр үеэс Сүхбаатар аймгийн авто тээврийн байгууллагын түүхэн замнал эхэлсэн байдаг.

Монгол Улсад авто тээврийн байгууллага үүсч хөгжсөний 90 жилийн ойг Сүхбаатар аймаг ёслол төгөлдөр тэмдэглэн өнгөрүүлж байна. Д.Сүхбаатар жанжны хөшөөнд цэцэг өргөснөөр өнөөдрийн үйл ажиллагаа эхэллээ.

Авто тээврийн салбар үүсч хөгжсөний 90 жилийн ойг тэмдэглэн өнгөрүүлэх хүрээнд Сүхбаатарын талбайд хуучин цагийн болон шинэ үеийн авто машин, тусгай зориулалтын тээврийн хэрэгслийн парад боллоо. Үргэлжлүүлэн авто тээврийн байгууллагуудын дунд “АВТОТЭЭВЭР-90” сэдэвт нээлттэй хаалганы өдөрлөг, хүнд даацын машины жолооч нарын ур чадварын үзүүлэх тоглолт, уран жолоодлогын тэмцээн, хуучин цагийн болон шинэ үеийн авто машины үзэсгэлэн болно.

Б.Энхтуяа /Сүхбаатар аймаг/