Дорнод аймгийн Хөлөнбуйр, Матад, Цагаан-Овоо, Булган зэрэг долоон суманд хадлангийн бригад нэмэлтээр гаргаж, нийт 30 мянган га талбайг чөлөөлжээ. Энэ талбайд төвийн аймгууд болон нийслэл орчмын эрчимжсэн мал аж ахуй, фермүүдийн хадлангийн 17 бригад гарч ажиллаж байна. Наймдугаар сарын эхээр эхэлсэн хадлангийн ажил ерөнхийдөө дуусч, өнгөрсөн долоо хоногоос эхлэн хадлангийн салаанууд бууж эхэлсэн. Энэ жил Дорнод аймгийн хэмжээнд 80 гаруй мянган тонн өвс бэлтгэхээр төлөвлөсний 50 мянга гаруйг нь орон нутагтаа, 30 мянган тонныг өөр аймаг, сумын хадланчид бэлтгэхээр болсон. Тэдний төлөвлөгөө 80 орчим хувьтай, нэг га талбайгаас дунджаар 7-10 центр өвс хураажээ.

 

Хадлангаас гадна зүүн аймгуудад мөн отрын бүс нутаг болгон хуваарилалт хийж, мал өвөлжүүлэхээр болсон байна. Дорнод аймгийн отрын бүст 300 мянга гаруй мал өвөлжих боломжтой гэсэн тооцоо гаргажээ. Улсын хэмжээнд ирэх өвөл 58 сая мал өвөлжинө гэсэн урьдчилсан тооцоо гарчээ. Өвөл, хаврыг өнтэй давахын тулд ойролцоогоор 1.4 сая тонн өвс бэлтгэх шаардлагатай. Сүхбаатар, Дорнод аймгийн хэмжээнд өвөлжилтийн бэлтгэл ажил мөн 80 орчим хувьтай байна. Энэ талаарх дэлгэрэнгүй мэдээллийг "Монголын мэдээ" сувгийн мэдээллийн хөтөлбөрөөс үзээрэй.