Гэр хорооллын дахин төлөвлөлтийн ажил нийт 12 байршилд эхэлсэн. Өнгөрсөн 2014 онд 588 айлын орон сууцны барилга ашиглалтад орсон. Харин өнөөдөр Баянзүрх дүүрийн 14-р хороонд Цагаан хуаран хотхоны хоёрдугаар ээлжийн барилга ашиглалтад орлоо. Ингэснээр 432 айл шинэ байрандаа орох боломжтой болж байна. Яг ийм эрчээр урагшилж чадвал Улаанбаатар хотын гэр хорооллын 15 хувь нь орон сууцны хороолол болж өөрчлөгдөнө.

"Цагаан Хуаран Консалтинг" компани Улаанбаатар хотын гэр хорооллын дахин төлөвлөх хөтөлбөрийн хүрээнд Баянзүрх дүүргийн 14-р хороонд таван блок бүхий 2248 айлын орон сууцны хотхон барихаар болсон. Эхний ээлжийн 432 айлын орон сууц өнгөрсөн оны 10 дугаар сард ашиглалтад орж байсан бол өнөөдөр 2-р ээлжийн орон сууц оршин суугчдаа хүлээн авлаа. 

Гэр хорооллын дахин төлөвлөлтийн хүрээнд нийслэлийн найман дүүргийн 24 байршил, 75 хэсэгчилсэн талбайд 38 аж ахуйн нэгж төсөл хэрэгжүүлнэ. "Цагаан Хуаран Консалтинг" компани гэхэд 70 нэгж талбар буюу 70 айлын хашааны газрыг чөлөөлж, барилга барьсан. Газраа чөлөөлсөн бүх айл байртай болжээ.

Гурван жилийн өмнөөс гэр хорооллын дахин төлөвлөлтийн ажлыг эхлүүлсэн. Сая илүү хүн амтай метро хотын толгойны өвчин болсон агаарын болон орчны бохирдол дэд бүтцийн хүрэлцээгүй байдлыг шийдэх арга бол гэр хорооллын дахин төлөвлөлт гэдгийг албаны хүмүүс онцолж байлаа.