Ховд аймгийн Үенч сумынхан энэ жил томоохон бүтээн байгуулалтыг хийлээ. Улсын төсвийн болон орон нутгийн хөгжлийн сангийн хөрөнгө оруулалтаар сургууль, эмнэлэг, соёлын төвдөө өргөтгөл хийж, шинэ гүүртэй болсон байна. Мөн Япон улсын Засгийн газрын өвсний үндэс төслийн хүрээнд цэцэрлэгийн шинэ өргөтгөл барьжээ. Бүх бүтээн байгуулалтын ажил нэгэн зэрэг дуусч, ашиглалтад ороод байна.
Тус сумынхан цэцэрлэгийнхээ хүчин чадлыг 50 ортой болгон нэмэгдүүлж, 50 гаруй жилийн настай хуучин Соёлын төвөө 320 хүний суудалтай болгон шинэчилжээ. Эрүүл мэндийн төвийн өргөтгөл амбулаторийн шинэ байрыг хоёр сарын хугацаанд барьж ашиглалтад оруулсан байна. Мөн Үенч голын дээгүүр анх удаа босоо тэнхлэгийн гүүр барьсан гээд олон, томоохон ажлуудыг нэгэн зэрэг хийж, ашиглалтад оруулахад сумын иргэдийн дэмжлэг, удирдлагуудын нэгдсэн бодлого гол үүрэгтэй байсан гэж Үенч сумын Засаг дарга Э.Уртнасан ярилаа.
Дашрамд өгүүлэхэд, Үенч сум хоёр ч удаа “Улсын тэргүүний сум”-аар шалгарч байжээ. Тус суманд өдгөө 4500 гаруй иргэн оршин сууж байна.