Өвөрхангай, Баянхонгор, Архангай аймгийг тогтмол нүүрсээр хангадаг Өвөрхангай аймгийн Баянтээгийн нүүрсний уурхай өнгөрсөн зун 315 мянган метр куб хөрс хуулалт хийсэн байна. Ингэснээр үйл ажиллагааны төлөвлөгөөгөөр энэ жил 100 мянган тонн нүүрс олборлохоор болоод байгаа юм байна. Баянтээгийн нүүрсний уурхай 2012 оноос ашигтай ажиллаж эхэлсэн байна. Үүний шалтгаан нь тухайн үед нэг тонн нь 15500 төгрөг байсан нүүрсний үнийг 23 мянгад хүргэсэн нь ашигтай ажиллахад голлон нөлөөлсөн хэмээн орон нутгийн удирдлагууд үздэг байна. Мөн менежментийн сайн бодлого нөлөөлж байгааг ч хэлдэг. Харин уурхайн удирдлагын хувьд цаашдаа нүүрсний чанар, техник хэрэгслийн шинэчлэл, мөн нарийвчилсан судалгаа хийх зэрэгт  түлхүү анхаарч ажиллах хэрэгтэй байгааг "Баянтээг" ХК-ийн гүйцэтгэх захирал Д.Мягмар хэлсэн юм. 

Нүүрсний чанар, үнийн уян хатан бодлогын үр дүнд нүүрсээ тогтмол нийлүүлдэг гурван аймгийн хэрэглэгчдээс гадна Улаанбаатар хот болон Булган аймгийн зарим сумдад ч нүүрс нийлүүлсэн. Мөн өнгөрсөн жил авто замын компаниудын нүүрсний хэрэглээ багагүй хувиар нэмэгдсэн учир 2014 онд 150 мянган тонн нүүрс борлуулж чаджээ. 1950-иад оноос үйл ажиллагаа явуулж эхэлсэн тус уурхайгаас олборлож байгаа нүүрсийг хэрэглэгчид болоод мэргэжилтнүүд чанартай сайн хэмээн дүгнэдэг. Уурхайн зүгээс ч нүүрснийхээ чанарт онцгой анхаардаг бөгөөд олборлож байгаа нүүрсний илчлэгийн хэмжээ нь 6500-7000 кил калори байгаа юм.

1978 онд хийгдсэн нарийвчилсан хайгуулын судалгаагаар Баянтээгийн нүүрсний уурхай нь үйлдвэржилтийн зэрэгжилтээрээ 29 сая тонн нүүрсний нөөцтэй хэмээн тогтоогджээ. Уурхай байгуулагдсанаас хойших 54 жилийн хугацаанд 5.5 сая тонн нүүрс олборлоод байгаа юм байна. Энэ талаарх дэлгэрэнгүй мэдээллийг "Монголын мэдээ" сувгийн мэдээллийн хөтөлбөрөөс хүлээн авч үзээрэй.