АНУ терроризмтой тэмцэх, Сирийн хямралыг зохицуулах асуудлаар ОХУ-тай яриа хэлэлцээ хийхээс татгалсан нь Вашингтон, Москвагийн Сирид баримтлах арга ажиллагаанд өөрчлөлт гаргахад бэрхшээлтэй болгож байна. Өөрөөр хэлбэл ОХУ-ын Сири дэх цэргийн ажиллагааг хамтарсан зарчмаар явуулах асуудлыг зөвлөлдөхөөр ерөнхий сайд Дмитрий Медведев тэргүүтэй төлөөлөгчдийг АНУ руу илгээх Москвагийн саналыг Цагаан ордон хүлээж авахаас татгалзсан юм. Үүний хариуд ОХУ Сирид терроризмыг дарахад хамтрах нь илүү зөв сонголт байх болно гэж өөрсдийн байр суурийг сөргүүлэн тавьлаа.

Харин “Исламын улс” бүлэглэлтэй хийж байгаа эвслийн хүчний тэмцэлд Москваг нааштай хувь нэмэр оруулах, Сирийн эрх баригч дэглэмийг дэмжихээ болих хүртэл АНУ Оростой Сири дэх үйл ажиллагаагаа нэгтгэн зохицуулах бодолгүй байгаа учраас дээрх саналыг нь няцаасан гэж Цагаан ордны төлөөлөгч мэдэгджээ. Тэрээр “Орос улс Сирид үйл ажиллагаа явуулах өөрийн хөтөлбөртэй, түүнээ дангаараа хэрэгжүүлж байгаа. Тиймээс биднийг өөрсөдтэйгээ нэгдэхийг ятгуулахаар ерөнхий сайдаа АНУ-д илгээх гэсэн ерөнхийлөгч Путины нэг ёсны аргаа барсан оролдлого” гэж дүгнэсэн байна.

Вашингтоны харж байгаагаар, Сирийн байдлыг тогтворгүйжүүлэхэд оролцож, үүнийхээ төлөө олон улсын хориг арга хэмжээний бай болсон Иран улс болон сирийн эрх баригчидтай Орос улс холбоо үүсгэж тусдаа үйл ажиллагаа явуулж байгаа гэдгийг Эрнест цохон хэлсэн байна. Үүний зэрэгцээ “Исламын улс” бүлгийн эсрэг Олон улсын эвсэлтэй хамтарсан кампанит ажиллагааны нэг хэсэг болохуйц хэмжээнд үр бүтээлтэй хувь нэмэр оруулж ажиллах нөхцөлд Оросын үйл ажиллагаанд АНУ баяр хүргэхэд бэлэн гэж Цагаан ордны төлөөлөгч гэлээ.