Ерөнхий сайд Ч.Сайханбилэг АНЭУ-д ажлын айлчлал хийх үеэр Засгийн газар, “Эрдэнэс Оюутолгой,”,“Туркойз Хилл Ресурс” “Рио Тинто” компаниуд “Далд уурхайн бүтээн байгуулалтын төлөвлөгөө”-нд гарын үсэг зурсан. Энэ даруйдаа далд уурхайн бүтээн байгуулалтад 6 тэрбум ам.долларын хөрөнгө оруулалт орж ирнэ гэж мэдэгдэж байсан. Тэгвэл өнөөдөр Оюутолгойн дараагийн шатны санхүүжилттэй холбоотойгоор манай улсад нэг ч төгрөг орж ирээгүй байна. Шалтгааныг нь “Ковер Монголиа” компанийн гүйцэтгэх захирал бөгөөд хөрөнгийн зах зээлийн шинжээч Д.Мөнхдөл  ингэж тайлбарлаж байна.

Оюутолгой компани дараагийн шатны санхүүжилтийг энэ онд багтаан эцэслэж, ирэх оны хоёрдугаар улирлаас далд уурхайн бүтээн байгуулалтыг эхлүүлэх төлөвтэй байгаа гэнэ. Энэ үед далд уурхайн хөрөнгө оруулалт эхнээсээ орж ирнэ. Гэхдээ бүгд нэг дор орж ирэх бололцоогүй. Хийгдэх бүтээн байгуулалт, төлөвлөгөөний дагуу хөрөнгө оруулалт үе шаттайгаар орж ирнэ гэдгийг шинжээчид хэлж байгаа юм. Далд уурхайн барилгын ажил дараа жилийн дундуур эхэлбэл, 2023 онд Хюго дамметийн ордыг ашиглалтад оруулах боломжтой. Далд уурхайн барилгын ажил явагдах хугацаанд энд 3000 хүн ажиллах бол, үйлдвэр ашиглалтад орсноор 1500 хүн ажиллах юм.