АНУ-ын тэнгисийн цэргийн хүчин Японы Йокосука хотын боомтод пуужингаас хамгаалах "Ижис" системийн хамгийн сүүлийн үеийн хувилбараар тоноглогдсон сөнөөгч хөлөг онгоцыг илгээжээ. Зүүн Азийн бүс тогтворгүйжих төлөвтэй байгааг харгалзан АНУ хамгийн дэвшилтэт хөлөг онгоцуудаа тус бүсэд байрлуулах төлөвлөгөөний хүрээнд энэ сөнөөгч онгоцыг илгээсэн байна.

АНУ-ын тэнгисийн цэргийн хүчний Бенфолд нэртэй хөлөг онгоц нь Йокосукад очсон "Ижис" пуужингаас хамгаалах системийн хамгийн сүүлийн үеийн загвараар тоноглогдсон 2 дахь хөлөг онгоц юм. Үүний өмнө өнгөрсөн зургаадугаар сард АНУ анх удаа энэхүү дэвшилтэт системтэй Чанселорсвилл хөлөг онгоцыг тус боомтод байрлуулсан.

Хойд Солонгосын алсын тусгалтай пуужингийн аюул занал, Өмнөд Хятадын тэнгист Хятад дэд бүтэц байгуулж байгаа зэргийг харгалзан АНУ байлдааны дэвшилтэт систем бүхий дахин нэг хөлөг онгоцоо 2017 он гэхэд Япон руу илгээхээр төлөвлөж байна. Ингэснээр Йокосука боомт дахь АНУ-ын "Ижис" системийн хуучин болон шинэчлэгдсэн загвараар тоноглогдсон хөлөг онгоцын нийт тоо 12-т хүрэх юм.

Мөн өчигдөр 150 метр урттай Бенфолд хөлөг онгоц тэнгисийн цэргийн 300 гаруй бүрэлдэхүүнтэй АНУ-ын 7-р флотын бааз байрладаг Йокосука боомтод очжээ. Хөлгийн ахмад Мишел Дэй энэ үеэр сэтгүүлчдэд хандаж хэлсэн үгэндээ АНУ, Япон холбоотон хоёр улс нь Энэтхэг-Ази-Номхон далайн бүс нутгийн энх тайван, аюулгүй байдлыг хангахад чухал үүрэг гүйцэтгэдгийг онцлоод, Японы тэнгисийн цэргийн өөрийгөө хамгаалах хүчинтэй нягт хамтран ажиллах сонирхолтой байгаагаа илэрхийлсэн байна.