Улаанбаатар хотоос 130 км-ийн цаана Багануурын уурхайд нүүрс тонн тутам нь 36 мянгаар зарагдаж байна. Харин нийслэл хотод хэрэглэгчдийн гар дээр ирэхдээ нэг л удаа гал түлэхэд хүрэлцэхүйц савлагдсан шуудайтай нүүрс 1500-2500 төгрөг буюу нэг тонн нь 180 мянган төгрөг болж үнэ нь замдаа 5 дахин өсөж ирдэг. Монголд өнөөдөр 5 дахин нугардаг ашигтай бизнес хаана ч байхгүй болчихсон. Гэтэл чухам яагаад нүүрсний үнэ ийнхүү хэд дахин өсөж хэрэглэгчийн гэрт очиж байгааг бид  Багануурын уурхайн амнаас эхлээд л учрыг нь хөөн сурвалжиллаа.

Багануурын уурхай дээр өмнө нь тонн нүүрсийг 27 мянган төгрөгөөр зарж байсан юм.

Улаанбаатараас Багануур ороод ирэх замд портер машин ойролцоогоор 45 мянган төгрөгийн бензин зарцуулна. Үүн дээр өндөрлөгөөгүй ачлаа гэж тооцвол 36 мянгыг нүүрсний төлбөрт өгнө. Ингээд тооцвол зардал нь нийт 81 мянга болж байна. Тэгэхээр үлдсэн нь жолоочийн ашиг болдог байх нь. Уг нь Улаанбаатар хотын Толгойт өртөөнд "Багануур илч" компанийн  нүүрс борлуулах цэг байдаг. Энд тонн тутмыг нь 70 мянгаар иргэдэд борлуулдаг гэсэн мэдээллийг Багануур ХК-ийн ажилтнууд өгч байсан.

Энэхүү мэдээллийн дэлгэрэнгүйг "Монголын мэдээ" сувгийн сурвалжлагч Б.Батбаяр өнөөдрийн “Цагийн хүрд”-ээр хүргэнэ.