Согтуу жолоочид хуулийн дагуу хариуцлага хүлээлгэлгүй, харин ч тэднээс авлига авч, зөрчлийг нүдээ аниад өнгөрөөсөн Замын цагдаа нарын хэрэг илэрч, тэд  үүрэгт ажлаасаа чөлөөлөгджээ. Ингэж чөлөөлөгдсөн хоёр цагдаагийн нэг нь 20 жил, нөгөөх нь тав дахь жилдээ ажиллаж байжээ.

Согтуугаар тээврийн хэрэгсэл жолоодвол хүлээлгэх хуулийн хариуцлага шинэ хуулиар улам бүр чангарсан.  Их хэмжээний мөнгөн торгууль төлж, эрхээ хасуулах төдийгүй баривчлагдах ял шийтгэлээс зугтаж, цагдаа нарт авлига өгч асуудлыг шийдэх гэсэн тохиолдол гарчээ. Ёс зүйгээ умартсан цагтаа нарын хэрэг ч илэрч тэднийг үүрэгт ажлаас нь чөлөөлсөн гэж Нийслэлийн цагдаагийн газрын хэлтсийн дарга, хурандаа Ц.Ариунболд хэллээ.

Согтуу жолоочийг торгохгүй, зүгээр өнгөрөөнө гэдэг нь хүний амь нас хэдхэн цааснаас хямд байгааг харуулсан увайгүй үйлдэл гэж иргэд шүүмжилдэг. Ер нь цагдаа нарын ёс зүйтэй холбоотой ийм зөрчил, дутагдал илэрдэг. Тухай бүрт нь хариуцлага тооцож ирсэн гэж албаныхан хэлж тайлбарлаж байгаа юм. Нэг хэсэг нь хуулиа мөрдүүлэх гэж өдөр, шөнө, халуун, хүйтнийг ажралгүй, эрүүл мэндээ золин байж зам дээр зогсож байхад нөгөө хэсэг нь амар хялбар аргаар мөнгө олох гэснээс болж цагдаа нарын нэр хүнд олны дунд унаж, ёс зүйгүй  гэсэн тодотголтой болж байна. Цагдаа хүн  тангарагаа мөрдөнө гэж мөрдэс зүүдэг. Бас баталсан хууль дүрмийг мөрдүүлнэ гэж үүрэг гүйцэтгэж байгаа юм. Дэлгэрэнгүй мэдээллийг Цагийн хүрдээс үзээрэй.