Уул уурхайн яам сар бүрийн сүүлийн 7 хоногт салбарынхаа мэдээллийг олон нийтэд хүргэдэг. "Ил тод уул уурхай" өнөөдөр боллоо.

Гацууртын ордын Төрийн эзэмшлийн хувь тогтоох тухай УИХ-ын тогтоолын төслийг өнгөрсөн 23-ны өдөр УИХ-д өргөн барьсан. Тэгвэл Гацууртын ордын Ажлын хэсэг өнгөрсөн хоёр сар гаруйн хугацаанд хөрөнгө оруулагч талтай гэрээ хэлцэл хийж, үндсэн ордод төр хувь эзэмших дээд хэмжээгээр буюу 34 хувь байхаар тогтоож, ашигт малтмалын нөөц ашигласны 3 хувийг тухайн компаниас авч байхаар тохирсон байна.

Гацууртын алтны үндсэн орд нь 50 тонн баталгаат алтны нөөцтөй, ашиглалтад ороход бэлэн болсон төсөл юм. Тус ордод 9 жил уул уурхайн олборлолт, 10 жил үйлдвэрлэл явуулна. Үйл ажиллагааны нийт зардал нь 1026.2 сая ам.доллар, 1769.2 сая ам.долларын борлуулалт хийж, 433.6 сая ам.долларын татвар, хураамж, төлбөр төлөх ба 1000 орчим ажлын байр нэмэгдэх тооцоотой байгаа юм.