Нийгмийн даатгалын багц хуулиудын шинэчилсэн найруулгын төслийн хэлэлцүүлэг үндэсний хэмжээнд өрнөж байна. Хангайн бүсийн хэлэлцүүлэг Орхон аймагт эхэлжээ. Хэлэлцүүлэгт Орхон, Дархан Уул, Хөвсгөл, Архангай, Сэлэнгэ, Булган аймгийг төлөөлж 50 гаруй хүн оролцлоо. Тодруулбал, тухайн аймгийн Ахмадын хороо, Ажил олгогч эздийн холбоо, ҮЭ-ийн хорооны төлөөлөл оролцож байна.

Нийгмийн даатгалын багц хуулиудын шинэчилсэн найруулгын төслийг Хүн амын хөгжил нийгмийн хамгааллын яамнаас боловсруулсан. Үндэсний хэмжээнд хэлэлцүүлэг өрнүүлж олон нийтийн саналыг тусгах ажлыг Нийгмийн даатгалын Ерөнхий газраас зохион байгуулж байна. Энэ үеэр хуулийн шинэчилсэн найруулгын талаар танилцуулж, оролцогчдын саналыг сонслоо. Уг хэлэлцүүлэг нь хоёр хоногийн турш үргэлжилнэ. 

Нийгмийн даатгал нь үндсэн таван тогтолцоотой. Үүний нэг нь Тэтгэврийн даатгалын тогтолцоо юм. Өнөөдрийн байдлаар манай улсын тэтгэврийн дундаж нь 158 мянган төгрөг. Энэ нь ахмад настнуудын нийгмийн баталгааг хангаж чадахгүй гэж Нийгмийн даатгалын Ерөнхий газрын дарга хэллээ.

Учир нь манай улсын иргэд тэтгэврийн даатгалын шимтгэлийг 14 хувиар төлдөг. Харин дэлхийн бусад улс оронд 25 хувиар төлдөг байна. Мөн манай улс тэтгэвэр олгоход зориулан хуримтлал бий болгоогүй. Энэ нь хөдөлмөр эрхэлж буй иргэдийн төлж буй шимтгэлээр ахмад настнуудын тэтгэврийг олгоход хүргэдэг байна. Тиймээс үүнийг залруулахад тэтгэврийн даатгалын сангийн орлогыг бүрдүүлдэг ажил олгогч, даатгуулагчдын дэмжлэг чухлыг хэлэлцүүлэгт оролцогчид онцоллоо.

Харин Эрүүл мэндийн даатгалын тогтолцооны хувьд хуулийн шинэчлэл нь хэрэгжиж байна. Эрүүл мэндийн салбарын санхүүжилтийн 45 хувь нь дээрх сангаас гардаг. Гэхдээ эмнэлгийн тусламж, үйлчилгээг чанаржуулах талаарх хуулийн заалтын хэрэгжилтийг сайжруулах шаардлагатайг хэлэлцүүлэгт оролцогчдын төлөөлөл хэллээ.

Түүнчлэн Үйлдвэрлэлийн осол мэргэжлээс шалтгаалах өвчний даатгалын тогтолцоог илүү сайжруулахын тулд урьдчилан сэргийлэх ажилд зарцуулах хөрөнгийг нэмэгдүүлэх хэрэгтэй талаар хэлэлцүүлэгт оролцогчид ярьж байна. Эдгээр болон бусад саналыг Нийгмийн даатгалын багц хуулиудын шинэчилсэн найруулгын төсөлд тусгах юм байна.