Австрали улс визийн хугацаа хэтрүүлэн тус улсад удаан хугацаанд оршин суусан,  эсвэл визгүйгээр хил нэвтрэхийг оролдсон хууль бус цагаач, дүрвэгчдийг түр орогнох газруудад байрлуулдаг. Эдгээр газрын нэг болох Крисмас арал дахь дүрвэгч, цагаачдын түр орогнох газраас Ираны дүрвэгч оргосон ч нэг өдрийн дараа түүний цогцсыг хадан цохионы ойролцоогоос олсон харамсалтай хэрэг гарчээ. Дүрвэгч яагаад амиа алдсан шалтгааныг тодруулах ажил үргэлжилж байна. Өнгөрсөн хоёрдугаар сард Манус арал дахь түр орогнох газарт нэгэн хазара дүрвэгч гадны нөлөөтэй нас барсан тохиолдол бас гарч байсан юм.

Ираны дүрвэгчийн үхэл ч мөн гадны нөлөөтэй, өөрөөр хэлбэл, түр орогнох газрын харуул хамгаалагч нарын буруугаас үүдэлтэй байх магадлалтай юм. Харин Австралийн Цагаачлалын хэрэг эрхлэх сайд энэ таамаглалыг үгүйсгэж байгаагийн сацуу тун удахгүй гарах задлан шинжилгээний дүнг танилцуулж, мэдэгдэл хийх юм байна. Ираны дүрвэгч амиа алдсан талаар сонссон түр орогнох газар дахь 200 гаруй дүрвэгч үймээн дэгдээж, нийтийн хоолны танхим, эмнэлэг, хуарангийн гадаа хашааг сүйдлэн, гал тавьсан байна. Үймээний үеэр хүн бэртэж, гэмтсэн мэдээ ирээгүй байгаа юм.