Монгол Улсын тусгай хамгаалалттай бүс нутаг бол үндэсний бахархал, бас баялаг байх ёстой. Бид хуулиараа ч энэ бахархлаа хамгаалдаг. Гэхдээ өнөөдөр хуулиас давсан эрх мэдэлтэй хүмүүс хуулийг өөрчлөх шийдлээ гаргажээ. Шинээр ашиглалтад орсон орон сууцууд ямар хуулийн заалтаар Монгол Улсын тусгай хамгаалалттай, Дархан цаазтай Богд уулын энгэрт газар авдаг нь ойлгомжгүй юм.

Тусгай хамгаалалттай газар нутгийн хязгаарлалтын бүс буюу Зайсангийн аманд аялал жуулчлалын зориулалтаар газар олгох нь хуулийн дагуу зөвшөөрөгдсөн. Гэхдээ аялал жуулчлал нэрийн дор орон сууц барьсаар байхад хэн ч, хэзээ ч тэднээс хариуцлага нэхэж байгаагүй нь Монголын маань нэг гайхамшиг.

Тухайлбал, энэ бүсэд байшин барих эрхийг Нийслэлийн ерөнхий төлөвлөгөөний газар олгодог. Тэд аялал жуулчлалын зориулалтаар 16 давхар орон сууц барихыг ч зөвшөөрдөг байна. Хэн, хэн нь зөвшөөрчихсөн энэ газарт бид яагаад амьдарч болдоггүй юм бэ гэх хэл амыг Хан-Уул дүүргийн 11 дүгээр хороо буюу Зайсангийн ам, 4 дүгээр хороо буюу Нүхтийн амны гэр хорооллынхон олон жилийн өмнөөс гаргасан. Өнгөрсөн тавдугаар сард тус дүүргээс сонгогдсон хоёр гишүүн тэдэнд газрыг нь ашиглуулах тал дээр БОНХАЖ-ын сайдтай хэлэлцэж зөвшөөрүүлжээ.

Олон жил хашаа байшинд амьдарсан Зайсангийн уугуул иргэдийг ийнхүү ажил болж эко бичил аялал жуулчлагчид нэрийн дор газар ашиглуулах гэрчилгээ олгож байгаа нь зөвхөн тэднийг ч бодсон хэрэг биш гэдэг нь тодорхой болсон. 

Богдхан уулыг ЮНЕСКО-гоос хүн ба шим мандлын нөөц хэмээн 1997 онд батламжилсан байдаг. Дэлхийн хамгийн анхны Дархан цаазтай энэ уул орчим бол дэлхийн хүн ба байгаль орчны нөөц бүс нутаг гэж ЮНЕСКО давхар дархалсан гэсэн үг. Хэрэв үнэхээр л хуулиа барьсан бол Байгаль орчин ногоон хөгжлийн яам ингэж хөл гишгэх зайгүй болтол аялал жуулчлалын зориулалтаар ч гэсэн газар олгохгүй байсан. Бараг 20 орчим жил ажлын ширээн доогуур явсан авлигалын үр дүн өнөөдөр эргээд хууль болон баталгаажина гэж хэн санах билээ.