УИХ-ын чуулганы нэгдсэн хуралдаанаар Монголын Засгийн газар, БНХАУ-ын Экспорт, импорт банк хооронд байгуулах нэг тэрбум америк долларын зээлийн ерөнхий хэлэлцээрийг соёрхон батлах тухай хуулийн төслийг хэлэлцээд гишүүдийн 80 гаруй хувь дэмжсэнээр батлагдлаа.

Засгийн газар уг зээлийн 703 сая долларыг Эгийн голын усан цахилгаан станц төсөл хэрэгжүүлэхэд, 102 сая долларыг Улаанбаатар-Мандалговь цахилгаан станцын агаарын шугам барихад, 40 саяыг нь Эрдэнэт станцын дулааны шинэчлэлд, 40 сая долларыг Гацуурт уулзварын авто замын өргөтгөлд, 66 сая долларыг Мах боловсруулах үйлдвэр байгуулахад, 20 саяыг Мэргэжлийн сургалт үйлдвэрлэлийн төвд тус бүр зарцуулахаар төлөвлөсөн байна. Нөхцөлийн хувьд зээл нь жилийн хоёр хувийн хүүтэй, нийт 20 жилийн хугацаанд эргэн төлөхөөс эхний долоон жилд үндсэн төлбөрөөс чөлөөлөгдөх юм.