Өнөөдөр нийслэлийн иргэдийн төлөөлөгчид хуралдаж, 2015 оны төсөвөө тодотгож баталлаа. Энэ удаад нийслэлийн төсвийг 73 тэрбумаар тодотгожээ.

73 тэрбум төгрөгийн тодотгол тендер нь зарлагдаагүй, ажил нь эхлээгүй бүтээн байгуулалтуудаас хийгдэж  байна. Өөрөөр хэлбэл, наймдугаар сарын 31-нээс хойш тендер зарлаагүй л бол тухайн бүтээн байгуулалтыг царцааж байгааг НЗД-ын Санхүү, эдийн засгийн асуудал хариуцсан орлогч Н.Батаа хэлж байна. 2015 оны нийслэлийн төсвийн гүйцэтгэл хангалтгүй байгааг өнөөдөр төсөвт тодотгол хийх үеэр зарим төлөөлөгч хөндөж байлаа. Тухайлбал, нийслэлийн өмчит 10 гаруй тооны аж ахуйн нэгж байгуулагдаж, 800 гаруй албан хаагчийн орон тоо нэмэгдсэн нь урсгал зардлаа хэмнэх бус харин ч эсрэгээрээ нэмсэн хэрэг боллоо гэж НИТХ-ын төлөөлөгч Н.Амарсайхан үзэж байсан юм.

2016 оны нийслэлийн төсвийг дараа долоо хоногт хэлэлцэнэ. Энэ жилийнхээс илүү өөдрөг төсөв батлагдана гэж хотын удирдлагууд хэлж байна. Тухайлбал, энэ оныхоос 130 гаруй тэрбумаар илүү буюу 700 орчим тэрбум төгрөгийн орлого олно гэж тооцоолж байна. Бүтээн байгуулалтуудаа ч үргэлжлүүлнэ. Ажлын байрыг ч нэмэгдүүлэх өөдрөг төсөв, төлөвлөгөө байгаа гэдгийг онцолсон юм.