Шинжлэх ухааны шинэ ололтуудад суурилсан шилдэг бүтээлийн үзэсгэлэн худалдаа өнөөдөр нээгдлээ. “Шинжлэх ухаан, инноваци үйлдвэрлэл- 2015” үзэсгэлэнд 50 гаруй байгууллагын 200 гаруй нэр төрлийн инноваци шингэсэн бүтээгдэхүүнийг дэлгэжээ. 

Монгол Улс элэгний хорт хавдрын нас баралтаараа дэлхийд хоёрдугаарт ордог. Харин манай эрдэмтдийн үхрийн элэгнээс гаргаж авсан бэлдмэл элэгний хорт хавдрын өсөлтийг бууруулж, эсийн хуваагдлыг зогсоодог болохыг олон шатны туршилт нотолсон байна.

Монгол эрдэмтэд чихрийн шижин өвчнийг эдгээх бэлдмэл бүтээжээ

Дэлхий дээр чихрийн шижнээр өвдсөн 264 сая хүн амьдардаг бол манай улсын 30 мянга гаруй иргэн ийм оноштой. МУБИС-ийн эрдэмтэд цагаан цээнэ, эмийн багваахай, хар болон хөх нэрс, халгай зэрэг ургамлыг ашиглан чимээгүй тахал гэж нэрлээд байгаа энэ өвчнийг эдгээх шинэ бэлдмэл бүтээсэн байна.

Ноос, ноолууран эдлэлээ цэвэрлэхийн тулд заавал хими цэвэрлэгээнд өгөх шаардлагагүй болжээ. Учир нь адууны тос, хужирнаас гаргаж авсан эко шампунийг ашиглаад гэрийн нөхцөлд хялбар аргаар ноос, ноолуурыг цэвэрлэж болно. Хүний биед харшил өгдөггүй, нэмэлт угаалгын бодис ашиглаад байх шаардлагагүй юм байна.

Шинжлэх ухааны ололт амжилт, үр дүн, шинэ технологийг үйлдвэрлэлд нэвтрүүлэх, оюуны бүтээлийг эдийн засгийн эргэлтэд оруулах зэрэг олон талын ач холбогдолтой тус үзэсгэлэнг жил бүр уламжлал болгон зохион байгуулдаг.  Шинжлэх ухааны ажилтны өдөрт зориулсан тус үзэсгэлэнг БСШУЯ, ШУА, Шинжлэх ухаан технологийн сан хамтран зохион байгууллаа. Энэ талаарх дэлгэрэнгүй мэдээллийг та "Цагийн хүрд" хөтөлбөрөөс үзээрэй.