Монгол, Орос хоёр орны иргэд харилцан визгүй зорчдог болоод жил гаруй болж байна. Өнгөрсөн хугацаанд хилийн дээс алхах иргэдийн тоо өсч, олон улсын хэмжээний соёл спортын арга хэмжээнд оролцох багуудын тоо ч нэмэгдсэн дүн мэдээ байна. Гэхдээ зорчигчдын аюулгүй байдал талаас илүү анхаарах хэрэгтэй. Тийм шаардлага үүсээд байгааг эх сурвалжууд тодотгожээ.

Өнгөрсөн жил Итгэлт Хамбад мөргөхөөр Улаан-Үдэд очоод нутагтаа буцаж ирж чадаагүй тохиолдол гарсныг Улаан-Үдэд суугаа  Ерөнхий консул Ц.Ганболд хэлж байна. Амарч, аялангаа их хамбад мөргөж, хувь заяагаа даатгаж явсан хүний бие нь муудаж, эмнэлгийн тусламж авч чадалгүй өөд болсон. Бас нэг тэтгэврийн настан зам гарч  яваад авто осолд оржээ.

"Алтанбулаг" боомтоор  өмнө нь нэг өдөрт 200-300 иргэн гардаг байсан бол визгүй болсноос хойш 700-800-д хүрсэн байна. Тээврийн хэрэгслийн хувьд ч 2-3 дахин өсч, өмнө нь өдөртөө 150-170 орчим байсан бол өнөөдрийн байдлаар 500 хүртэлх тооны тээврийн хэрэгсэл боомтоор гарч байгаа юм байна. Нийт урсгалын 60-70 орчим хувь нь Итгэлт Хамбад мөргөхөөр хилээр гардаг гэсэн дүн гарчээ. Хүндрэлтэй байдал Эрхүү, Кызыл хотуудад ч мөн ижил гэдгийг Ерөнхий консулууд ярилаа.

Харилцан визгүй зорчдог болсон харилцааны дэвшлээ өргөжүүлж, сайжруулах хэрэгтэйг Өвөр байгалийн хязгаарын асуудал хариуцсан дэд сайд Аникьев хэлж байна. Зорчигчдын ая тухтай, аюулгүй байдлыг хилийн шалган нэвтрүүлэх цэгээс нь эхэлж хангах ёстой гэж тэрбээр үзэж байна. Өвөр байгалийн хязгаар нутгийн хувьд Дорнод, Хэнтий аймагтай 800 гаруй км-ээр хиллэдэг юм.

Эдгээр асуудлуудыг шийдэхэд хоёр улсын Засгийн газар хамтран ажиллана. Шат дараатай хамтран ажиллана гэдгийг холбогдох албаныхан хэлсэн. Иргэдийн хувьд дор бүрнээ мэдээлэл авч, хуулиа, дүрэм журмаа дагаж мөрдөх хэрэгтэйг сануулж байсан юм. Энэ талаарх дэлгэрэнгүй мэдээллийг "Цагийн хүрд"-ээс үзээрэй.