Өмнөд Солонгосын Засгийн газар бие дааж явуулсан үзлэг, шалгалтаар "Волксваген" компанийн хуучин хөдөлгүүртэй автомашинуудад хий ялгаруулалтыг бууруулж мэдээлдэг төхөөрөмж санаатайгаар суурьлуулсан гэдэг дүгнэлт гарчээ. Иймд Өмнөд Солонгос 125.522 автомашинаа зах зээлээс нь эргүүлэн татахыг Германы "Волксваген" компаниас шаардсан байна.

АНУ Европын автомашин үйлдвэрлэгч хамгийн том компани "Волксваген"-ы автомашины хөдөлгүүрт асуудал байгааг илрүүлсэнтэй холбогдуулан тус компанийн автомашиныг хэрэглэгч орнууд дор бүрнээ хяналт шалгалт хийхийг зөвлөсөн.

Энэ дагуу Өмнөд Солонгос бие даан шалгалт хийсний дүнд дээрх зөрчлийг илрүүлж, 2016 оны нэгдүгээр сарын 6 гэхэд эргүүлэн таталт төлөвлөгөө баталсан байхыг шаардаж, 12.31 сая америк долларын торгууль ногдуулахаа мэдэгджээ. Өмнөд Солонгосын тээврийн яамны мэдээлэлд бичсэнээр эргүүлэн таталтанд 2008-2015 оны хооронд Өмнөд Солонгосны зах зээлд зарагдсан Евро-5, ИйЭй-189 дизель хөдөлгүүртэй автомашин, алдарт Тигуан загварын автомашинууд багтах юм байна.

Германы алдарт "Волксваген"-ы дизель хөдөлгүүртэй автомашин Хюндай Мотор, Киа Моторс зэрэг дотоодын томоохон компаниуд ноёлдог Өмнөд Солонгосын зах зээлд сүүлийн жилүүдэд хүч түрэн орж ирж, багагүй ашиг орлоготой ажиллаж байгаа юм. Өнгөрсөн есдүгээр сард "Волксваген" компани дэлхийн зах зээлд зарагдсан 11 сая автомашинд нь утаа ялгаруулалтыг бууруулж мэдээлдэг төхөөрөмж суурилуулсан байгааг хүлээн зөвшөөрсөн юм.