ОХУ-ын ерөнхийлөгч Владимир Путин тус улсын онгоцыг сөнөөсөн Туркийн эсрэг нэмэлт хориг арга хэмжээ хэрэгжүүлж магадгүй гэдгээ мэдэгдлээ. Өчигдөр тэрээр тогтсон уламжлалын дагуу Холбооны хуралд өөрийн илтгээлтээ хүргэхдээ энэ тухай мэдэгджээ.

Оросын ерөнхийлөгч энэ илтгэлээрээ улс орныхоо өнөөгийн байдалд үнэлэлт дүгнэлт өгч, дотоод гадаад бодлогын үндсэн чиглэлүүд, тэдгээрийн хэтийн төлөвийг тодорхойлдог юм. Өчигдөр Москвагийн цагаар 15 цагт эхэлсэн илтгэлдээ Путин "Туркийг хийсэн үйлдэлдээ харамсах болно" гээд, тус улсын эсрэг хэрэгжүүлэх арга хэмжээ худалдааны хоригоор хязгаарлагдахгүй болохыг мэдэгдсэн байна.

Мөн тэрээр Турк улс "Исламын улс" бүлэглэлээс газрын тос худалдан авч, энэ үйлдлээрээ терроризмыг санхүүжүүлж байна гэх байр сууриа дахин илэрхийллээ. Өчигдөр Туркийн ерөнхий сайд Ахмет Давутоглу энэ асуудлаар тайлбар хийхээр хэвлэлийн бага хурал зохион байгуулсан. Тэрээр худал суртал ухуулга явуулах Зөвлөлтийн үеийн аргаа ашиглаж, Туркийг гүжирдэж байна гэж Оросуудыг буруутгаад, тус мэдээлэл ор үндэсгүй, үүнийг АНУ ч баталгаажуулсан болохыг онцлон тэмдэглэсэн байна.