ОХУ дэлхийд экологийн, цэвэр, өндөр чанартай хүнсний бүтээгдэхүүний хамгийн том нийлүүлэгч орон болох зорилготойг ерөнхийлөгч Владимир Путин Холбооны хуралд өгсөн илгээлтдээ онцолсон юм. Мөн Орос улсад 2020 он гэхэд өөрийн хүнсний бүтээгдэхүүний эрэлтээ бүрэн хангах боломж бий гэдгийг ерөнхийлөгч Путин мэдэгдсэн байна. 

Оросын хувьд экологийн цэвэр хүнс үйлдвэрлэхэд газрын хөрс, усны эх нөөцийн хувьд бүрэн боломжтой, сүүлийн жилүүдэд Барууны ноёлж ирсэн хүнсний бүтээгдэхүүний зах зээл өндөр чанартай, эрүүл хүнсний бүтээгдэхүүнээр дутагдах болсон гэж Кремлийн тэргүүн тэмдэглэсэн юм. Хүнсний бүтээгдэхүүний зах зээл дээр ОХУ импортлогч биш экспортлогч орон болж байгаа гэдгээ зарлалаа. 10 жилийн өмнө Орос улс хүнсний хэрэглээнийхээ бараг 50 хувийг гаднаас авдаг, импортын бүтээгдэхүүнээс хамааралтай байсан бол өнөөдөр хөдөө аж ахуйн гаралтай хүнсний бүтээгдэхүүний экспорт нь 20 тэрбум америк долларт хүрчээ.

Энэ нь Оросын зэвсгийн худалдааны агшгийн дөрөвний нэг, байгалийн хий экспортын орлогын гуравны нэгтэй тэнцэх үзүүлэлт юм байна. Өнгөрсөн есдүгээр сард Москва генийн өөрчлөлттэй хүнсний бүтээгдэхүүнийг хэрэглээнээс гаргах шийдвэрт хүрсэн. Одоогоор ОХУ Барууны хориг арга хэмжээний хариуд Европын холбоо, АНУ-ын хүнсний бүтээгдэхүүний импортыг хориглоод байна. Мөн Турк улс цэргийн онгоцыг нь унагасантай холбогдуулан Туркийн хөдөө аж ахуйн гаралтай хүнсний бүтээгдэхүүний импортонд хориг тогтоосон. Энэ нь ирэх оны нэгдүгээр сарын 1-нээс хүчин төгөлдөр хэрэгжих юм.