Иракийн засгийн газар хэрвээ Турк улс Мосул хотын хойд бүсээс цэргээ 48 цагийн дотор гаргахгүй бол НҮБ-д хандахаа мэдэгджээ. Багдадын зүгээс Турк улс цэргээ оруулах тухайгаа хэлж, мэдэгдэлгүй шууд оруулсан нь тусгаар улсын бүрэн эрхийг зөрчсөн алхам гэж үзэж байна. Харин Туркийн Ерөнхий сайд Ахмет Давутоглу өмнө нь байгуулсан цэргийн баазад цэргийн бүрэлдэхүүнээ сольсноос биш шинээр цэрэг оруулсан алхам биш гэж шийдвэрээ хамгаалжээ.

Гэхдээ нэмж цэрэг илгээхгүй. Харин энэ удаад оруулсан цэргээ эргүүлж татахгүй гэдгээ Туркийн талаас Ирак улсад мэдэгдсэн байна. Иракийн хойд бүсийн Мосул хот нь өнгөрсөн оноос хойш "Исламын улс" бүлэглэлийн хяналтад байгаа. Гэвч өнгөрсөн долоо хоногт Турк улс Мосул хот дахь "Исламын улс" бүлэглэлийн хяналтад байдаг газрын тосны ордуудыг хамгаалах зорилгоор тэнд 100 гаруй цэрэг мөн танк оруулсан юм. Мосул хот эзлэгдсэн нь "Исламын улс" бүлэглэл тэлэхэд гол хүчин зүйл болсон бөгөөд Иракийн Засгийн газрын армийнхан энэ хотыг хэт даврагчдаас чөлөөлөхийн тулд олон удаагийн давшилт хийсэн боловч үр дүнд хүрээгүй юм.