АН-ын удирдах ажилтуудын зөвлөлгөөн өнөөдөр боллоо. Зөвлөлгөөнөөр хэлэлцэх гол асуудал нь  намын бодлогын зөвлөл байгуулах тухай байлаа. Учир нь АН-ын удирдлагын зүгээс “Бодлогын зөвлөл байгуулах” шийдвэр гаргаж, үүнийг  хэрэгжүүлэхэд намын бүх шатны удирдах ажилтнуудын санал бодлыг сонсох хэрэгтэй, үүнийгээ эргээд бодлогодоо тусгах нь зөв гэж үзсэн байна.

АН нь өнгөрсөн хугацаанд ямар ажил хийж амжуулсан, аль салбарт илүү амжилт гаргасан зэргийг нарийн судалж, цаашдын зорилтыг тодорхойлохын тулд намын бодлогын зөвлөл байгуулж байна. Энэ зөвлөл нь 12 бүлгэмтэй. Бүлгэм  тус тус бүр өөр өөрийн салбарт судалгаа хийнэ. Намын даргын гаргасан энэ шийдвэрийг хэрхэн хэрэгжүүлэх талаар АН-ын удирдах албаны гишүүд өнөөдөр санал бодлоо солилцсон юм.

Энэ үеэр АН-ын Бодолгын зөвлөлийн ажлын албаны дарга С.Ламбаа "Цаашдаа бодлогын зөвлөл нь намын гол хөдөлгөх хүч, мэдээллийн сан болж явна" гэж байна. Энэ зөвлөлд АН-ын Үндэсний зөвлөлдөх хорооны 228 гишүүн орж ажиллах юм байна.

Өнөөдрийн уулзалтад АН-аас сонгогдсон УИХ-ын болон Засгийн газрын гишүүд аймаг дүүргийн засаг дарга нараас гадна намын дарга нар мөн оролцлоо.