Сири дэх "Исламын улс" бүлэглэлд өгч байгаа Оросын цэргийн нисэх хүчний агаарын цохилтод 200-гаад энгийн иргэн өртөж, амь үрэгдсэн гэж олон улсын хүний эрхийн "Эмнести Интернэшнл" байгууллага мэдээлжээ. Тус байгууллага Оросын онгоцууд цохилт өгч байгаа 5 бүс нутагт судалгаа хийж, гэрч, хүний эрхийн төлөө тэмцэгчдийн өгсөн мэдээллийг нэгтгэж тайлангаа гаргажээ.

Өрнөдийн хэвлэл мэдээллийн хэрэгслүүд сүүлийн үед энэ мэт мэдээлэл ихээр цацах болсон. Мөн Оросыг "Исламын улс" бүлэглэлд бус, аядуу үзэлт босогчдын байршилд голлон цохилт өгч байна гэж АНУ зэмлэж байгаа. Харин Орос улс эдгээр мэдээллийг эрс няцааж, үүнийг өөрийнх нь эсрэг явуулж байгаа суртал ухуулгын дайн гэж нэрлэж байгаа юм. Энгийн иргэд Оросын агаарын цэргийн ажиллагаанд өртөн, амь үрэгдсэн гэх мэдээ тус улсын онгоцууд бөмбөгдөлтөө эхлээгүй байхад өрнөдийн хэвлэлүүдээр цацагдаж эхэлсэн гэдгийг өмнө нь Ерөнхийлөгч Путин мэдэгдэж байсан. Энэ удаад Их Британид төвтэй "Эмнести Интернэшнл" байгууллага Сирийн Хомс, Хама, Идлиб, Латакия, Алеппо гэсэн таван хотод гэрчүүдтэй ярилцлага хийсний дараа Орос улс Сири дэх агаарын цэргийн ажиллагаагаараа олон улсын хүмүүнлэгийн хууль тогтоомжийг ноцтой зөрчиж байна гэж дүгнэн, энэ талаар тайлан нийтэлсэн байна.

Гэхдээ "Эмнести Интернэшнл"-ийн энэ тайланг баталгаажуулах баримт нотолгоо одоогоор алга байгаа. Дашрамд сануулахад, зөвхөн Орос төдийгүй АНУ тэргүүтэй агаарын цэргийн эвслийн онгоцууд ч Сирид агаараас цохилт өгөхдөө энгийн иргэдийн аминд хүрч байна гэх зэмлэлд өртсөөр ирсэн юм. Цаашид эвслийн эдгээр орны агаарын цэргийн ажиллагааны талаар судалгаа хийнэ гэдгээ "Эмнести Интернэшнл" мэдэгдсэн байна.