Хятадын зүүн хойд хэсгийг бүрхсэн утаанаас үүдэн агаарын бохирдлын дээд буюу улаан түвшний түгшүүрийг 10 хотод дахин зарлажээ. Өнгөрсөн шөнө Хятадын Байгаль орчны яамнаас гаргасан мэдэгдэлд улаан түгшүүр хэрэгжиж байгаа аж үйлдвэрийн томоохон боомт хот Тяньжинь болон түүнийг тойрсон 9 жижиг хотын иргэдийг онцын шаардлагагүй бол орон гэрээсээ гарахгүй байхыг зөвлөсөн байна. Хятадад ийнхүү 3 дахь удаагаа агаарын бохирдлын улаан түгшүүр зарлахтай зэрэгцэн амны хаалт, агаар цэвэршүүлэгч төхөөрөмжийн худалдаа эрс нэмэгдэж байгаа юм. Үүнээс гадна “Савласан цэвэр агаар” худалдаалах болсон нь олон нийтийн анхаарлыг багагүй татаж байна. Лаазанд шахсан агаараар амьсгалж байгаа эмэгтэйн зураг энэ 7 хоногт цахим ертөнцөд түгж, улмаар энэ зургийг харсан Хятадын иргэд Канадад үйлдвэрлэсэн энэхүү бүтээгдэхүүнийг туршиж үзэхээр хошуурч эхэлцгээсэн байна. Тус улсад 150 удаа амьсгалах хэмжээний цэвэр агаартай нэг лааз 120 юань буюу 18.5 америк доллараар худалдаалагдаж байна.