Ирэх сард Женев хотноо НҮБ өөрийн зуучлал дор Сирид энх тайван тогтоох тухай яриа хэлэлцээ зохион байгуулахаар төлөвлөж байгаа. Энэ хэлэлцээг харь орнуудын оролцоогүйгээр зохион байгуулах нөхцөлд Сирийн Засгийн газар оролцоход бэлэн гэдгийг тус улсын Гадаад хэргийн сайд Валид Муаллем өчигдөр Хятадад айлчлах үеэрээ албан ёсоор мэдэгдсэн байна.

НҮБ-ын Аюулгүйн зөвлөл өнгөрсөн 7 хоногт Сирийн асуудлаар тогтоол батлан, энх тайван тогтоох яриа хэлэлцээ эхлүүлэхийг талуудад уриалсан. Харин Сирийн Засгийн газар өчигдөр тус тогтоолын талаар анх удаа байр сууриа илэрхийлсэн нь энэ юм. Үүнтэй зэрэгцэн Сирийн эрх баригчид Дамаскийн Ярмук дүүрэг дэх Палистины дүрвэгчдийн хуаранг чөлөөлөх тухай "Исламын улс" бүлэглэлийн дайчидтай тохиролцоонд хүрлээ. Энэ тохиролцооны дагуу "Исламын улс" бүлэглэлийн дайчид Ярмук дүүргийг чөлөөлсний хариуд Сирийн Засгийн газар тэднийг тус бүлэглэлийн гол түшиц газар болох Ракка хот руу аюулгүй зорчих боломжоор хангахаар болжээ. Тохиролцоо хэрэгжсэнээр Ярмук дүүрэг дэх эдгээр дайчдын хяналтад орсон хэсэгт амьдарч байгаа 18 мянга орчим оршин суугчдад хүмүүнлэгийн тусламж хүргэх боломж нээгдэх юм байна.