Автобусны зогсоол дээр автомашинууд зогсож, хөдөлгөөнд саад учруулж байгаад иргэд бухимдалтай байна. Үүнээс болж зарим автобус буудал хэтэрч зогсох, бүр зарим нь буудал дээрээ зогсохгүй өнгөрөөд явчихдаг хүндрэл бэрхшээл гарсаар байгаа юм. Энэ асуудлыг шийдэхийн тулд хөдөлгөөнд саад учруулж байгаа жолооч нарт авах арга хэмжээг чангатгах санал гараад байна. 

Тухайлбал, "Тэнгис" кино театрын урд талын автобусны зогсоол дээр л гэхэд өдрийн цагаар автомашин олноор эгнэж, зай талбайг нь эзэлдэг байна. Автобусны зогсоолыг таглаж зогсох ийм байдал хичээл сургууль, ажил тарах цагаар бүр ихэсдэг байна. 

Жолооч нарын хувьд таксинд явж байгаа үедээ автобусны зогсоол дээр машинаа байрлуулж зогсдог. Бас зарим нь зогсоол хүрэлцээгүй болохоор ингээд байрлуулчихдаг гэх тайлбарыг хэлж байна. Энэ байдал олны хөл хөдөлгөөн ихтэй зогсоол бүрт л гардаг. Авто тээврийн хяналтын байцаагч хөдөлгөөнд саад болж байгаа жолооч нарыг 5 мянган төгрөгөөр торгохоос хэтэрч чаддаггүй. Тиймээс цаашид хатуу арга хэмжээ авч ажиллах шаардлагатай гэж Авто тээврийн хяналтын байцаагч Ш.Ганхуяг хэллээ. 

Замын хөдөлгөөнд саад учруулж, иргэдийн нийтийн тээврээр зорчих эрхэнд халдаж байгаа автомашинтай жолооч нарын энэ байдлыг багасгах, цаашлаад таслан зогсооход иргэд өөрсдөө ч гэсэн давхар хяналт тавих хэрэгтэй байгааг Авто тээврийн хяналтын байцаагчид хэллээ. Автобусны зогсоол таксины зогсоол биш учраас жолооч нарт ч авах арга хэмжээ, мөнгөн торгуулийн хэмжээг нэмэгдүүлэх нь зөв гэсэн байр суурийг иргэд хэллээ.