Гэмт  хэрэг, зөрчлөөс  урдчилан сэргийлэх, нийтийн хэв журам сахиулах ажилд олон нийтийн  цагдаагийн ажилтны хувь нэмэр их байдаг. Төсөв мөнгөгүйгээс  болоод зогсоод байсан олон нийтийн  цагдаа  нарын үйл ажиллагаа  орон нутагт сэргэж  байна. Тухайлбал, Завхан аймаг сумдад ажиллах олон нийтийн цагдаа  нарын үйл ажиллагааны зардалд 34.7 сая төгрөгийг зарцуулахаар болсон байна. 

Завхан аймагт судалгаанд хамрагдсан иргэдийн 76.9 хувь нь олон нийтийн цагдаа хэрэгтэй гэж үзжээ. Энэ судалгаа нь иргэдтэй тулж ажиллаж, иргэдийн аюулгүй байдлыг хангахад олон нийтийн цагдааг ажиллуулах зайлшгүй хэрэгтэй гэдгийг харуулсан байна. Тиймээс  төрийн болон олон нийтийн  байгууллагуудын санал санаачилгыг  үндэслэн  энэ жилээс эхлэн  олон нийтийн цагдааг ажиллуулахаар болсон байна. Аймгийн хэмжээнд гарч байгаа нийт гэмт хэргийн дийлэнх хувийг  малын хулгайн гэмт хэрэг эзэлж ирсэн. Сумдад олон нийтийн цагдаа ажиллуулснаар иргэдтэй ойр ажиллаж болзошгүй гэмт хэргээс урьдчилан сэргийлэх боломж бүрдэнэ хэмээн үзэж байгаа аж. Олон нийтийн цагдаагийн ажилтнууд сумын удирдлага, цагдаагийн байгууллагатай гурвалсан гэрээ байгуулж, сургалтад хамрагдсанаар сумдаа томилогдон  ажиллах юм байна.