Өнгөрсөн онд Архангай аймагт түрээсийн орон сууц ашиглалтад орсон. Гэвч одоог хүртэл холбогдох журам нь батлагдаагүй тул ашиглалтад авах боломжгүй байгаа юм байна. Хэрвээ журам нь батлагдвал эхний ээлжинд ахмадуудаа оруулахаар аймаг орон нутгийн удирдлагууд төлөвлөөд байна. 

2014 онд хэрэгжиж эхэлсэн “Аймаг бүрт 1000 айлын орон сууц” төсөлд Архангай аймаг хамрагдаж, 120 айлын орон сууц ашиглалтад орсон. Төрийн орон сууцны корпорацийн захиалгаар Монгол Улсын Хөгжлийн банкны Чингис бондын хөрөнгөөр санхүүжүүлж хийсэн энэ ажил орон нутгийн иргэдийн дунд хамгийн их эрэлттэй байна. Түрээсийн орон сууцны журам батлагдчихвал эхний ээлжинд ахмадуудаа оруулах төлөвлөгөөтэй байна гэж аймгийн удирдлагууд хэлж байна.  

Архангай аймагт 8200 орчим ахмад настан бий. Үүнээс 1100 гаруй ахмад нь хүний асаргаанд байх шаардлагатай юм байна. Аймгийн төвдөө л гэхэд 230 гаруй хэвтрийн ахмад настан байгаа учраас түрээсийн орон сууцанд хамруулах ажлыг эхлүүлэхээр болжээ. 

Түрээсийн орон сууцны хөтөлбөрийн хүрээнд Улаанбаатар хотод 16 мянга, хөдөө орон нутагт дөрвөн мянган айлын орон сууцны барилгыг барихаар төлөвлөж байна. Харин түрээсийн орон сууцны журам ирэх сарын 1-нээс хэрэгжиж эхэлнэ гэж Төрийн орон сууцны корпорациас мэдээлсэн юм.