Өрхийн зарлагын хэмжээ ч 2014 онтой харьцуулахад 130 мянган төгрөгөөр буурсан байна. Ажилгүй иргэдийн тоо нэмэгдэж, үүнээс үүдсэн ажилгүйдлийн тэтгэмж нэмэгдэж 2016 оны нэгдүгээр сарын байдлаар 2 тэрбум 195 сая төгрөгийг ажилгүйдлийн тэтгэмж хэлбэрээр олгосон. Тиймээс нийгмийн халамжийн тэтгэмж, тэтгэвэр авах иргэний тоо 31.4 мянгаар нэмэгдэж, тэдэнд олгосон тэтгэвэр 2.4 тэрбум төгрөгөөр өсчээ.

Мөн аж ахуй нэгж, байгууллага, иргэдэд олгосон зээлийн өрийн үлдэгдэл 11.8 их наяд төгрөгт хүрсэн байна. Хугацаа хэтэрсэн зээлийн өрийн үлдэгдэл 922 тэрбум бол өмнөх оныхоос 604 тэрбум төгрөгөөр буюу 2.9 хувиар өсчээ.

Харин Монгол Улсын мөнгөний нийлүүлэлт энэ оны нэгдүгээр сарын эцэст 9.9 их наяд болж өмнөх сараас 191.7 тэрбум төгрөгөөр буурсан байна. Энэ нь өмнөх онтой харьцуулахад даруй 456 тэрбум төгрөг буюу 4.4 хувиар буурсан үзүүлэлт юм. Түүнчлэн Улсын нэгдсэн төсвийн тэнцэл 79.8 тэрбум төгрөгийн алдагдалтай гарсныг Улсын бүртгэл, статистикийн ерөнхий газраас мэдээллээ.