Хилийн чинадад ажиллаж, амьдарч байгаа монгол иргэдэд хандсан “Дэлхийн Монголчууд” дунд хугацааны хөтөлбөр Засгийн газраас батлагдсантай холбогдуулан Гадаад хэргийн сайд Л.Пүрэвсүрэн Гал бичин жилийн шинийн наймны өдөр хилийн чинад дахь Монгол Улсын дипломат төлөөлөгчийн газрууд болон монголчуудын холбоодын төлөөлөлтэй цахим уулзалт хийж, сар шинийн мэндчилгээ дэвшүүллээ. Уулзалтад гадаадын 24 улсад оршин суугаа монголчууд оролцлоо.

Л.Пүрэвсүрэн сайд энэхүү цахим уулзалтад оролцогчдод Засгийн газрын энэ оны анхдугаар хуралдаанаар баталсан “Дэлхийн Монголчууд” хөтөлбөрийн үндсэн зорилтуудыг хэрэгжүүлэхэд хилийн чинадад суугаа монгол иргэд болон тэдний холбоодын үүрэг, санаачилга, хамтын ажиллагаа чухал болохыг онцлон тэмдэглэж, хөтөлбөрийн талаар товч мэдээлэл хийв.

Уулзалтад оролцсон монгол иргэд “Дэлхийн Монголчууд” хөтөлбөрийн хүрээнд хүүхдүүддээ эх хэл, соёлыг зааж сургах, сурах бичгээр хангахад санхүүгийн дэмжлэг үзүүлэх, хилийн чинадад өсч торнисон монгол оюутан залуусыг эх оронд нь дадлага хийлгэх асуудлыг бодлогын түвшинд тавьж шийдвэрлэхэд Гадаад хэргийн сайдаас дэмжлэг үзүүлэхийг хүсэхийн сацуу монгол иргэдийн зохион байгуулж байгаа арга хэмжээ, санаачилгыг санхүүжүүлэх боломж, нөхцөлийн талаар саналаа хуваалцлаа.

Уг цахим уулзалтыг цаашид холбогдох төрийн болон төрийн бус байгууллага, судлаачдыг оролцуулан тодорхой сэдвээр сар бүр зохион байгуулахаар төлөвлөсөн байна.

Энэ удаагийн Гадаад хэргийн сайдын хилийн чинадад суугаа иргэдтэйгээ хийсэн уулзалтад яамны холбогдох ажилтнуудаас гадна “Хилийн чинад дахь Монголчуудын зөвлөл” ТББ-ын Ерөнхий нарийн бичгийн дарга Б.Мөнхдөл, "Цахим өртөө" холбоо ТББ-ын Удирдах зөвлөлийн дарга Ч.Лодойравсал нар оролцов.