Түрээсийн орон сууц хөтөлбөр өнөөдрөөс буюу гуравдугаар сарын 1-нээс хэрэгжиж эхлэх ёстой байсан. Гэвч Төрийн орон сууцны корпораци хэрэгжүүлэх журмаа тодорхой болгоогүй учир дахин 20 хоногоор хойшлуулахаар болсон байна. Тодруулбал, Түрээсийн орон сууцанд хамрагдах хүсэлтэй иргэдийг гуравдугаар сарын 15-наас эхлэн  ажлын 5 хоногийн хугацаанд бүртгэхээр болжээ.

Өнгөрсөн 7 хоногт Барилга, хот байгуулалтын яамнаас Түрээсийн орон сууцны хөтөлбөрийн журмыг танилцуулахдаа гуравдугаар сарын 1-нээс хэрэгжинэ гэж мэдээлсэн. Тиймээс өглөөний 10 цагийн орчим Төрийн орон сууцны корпорацийн гадна түрээсийн хөтөлбөрт хамрагдах хүсэлтэй иргэдийн урт цуваа үүссэн байлаа. Найман хувийн ипотекийн зээлийн урьдчилгаагаа төлж чадахгүй залуу гэр бүл, өндөр настан, төрийн албан хаагч, өрх толгойлсон эцэг эх, байгалийн гамшигт өртсөн айл өрх гээд олон хүний хувьд хүлээлт үүсгэсэн сэдэв нь Түрээсийн орон сууц хөтөлбөр болоод байна.

Түрээслэх хүсэлтэй иргэдийн тоо 2014 онд хийсэн судалгаагаар 23  мянга орчим байна. Гэвч 2016 оны хувьд 30-50 метр квадрат 929 орон сууцыг нийслэл болон орон нутагт түрээслэхээр болсон. Эрэлт, нийлүүлэлтийн харьцаа хангалтгүй байгаа учраас бүртгүүлсэн иргэдийн дунд сугалаа явуулахаар болжээ.

Үнийн хувьд өрхийн орлогын 25 хувиас хэтрэхгүй байхаар шийдэж, нийслэл хотод метр квадрат нь 5500, хөдөө орон нутагт 4000 төгрөг байхаар тусгасан. Түрээсийн гэрээ хийсэн иргэн тухайн байранд 5 жил хүртэл хугацаагаар амьдраад дараагийн айлдаа шилжүүлэх журамтай. Өөрөөр хэлбэл, урьдчилгаа төлбөрөө гүйцээгээд өөрийн болгох боломжгүй.

Ийнхүү Түрээсийн орон сууц хөтөлбөрийн бүртгэлийн хугацаа 20 хоногоор сунах болсон гол шалтгаан нь орон нутагт хөтөлбөрийг хэрэгжүүлэх мэргэжилтнүүдийг бэлтгэж байгаатай холбоотой. Мөн хөтөлбөрийг гардан гүйцэтгэх ТОСК-ийн хэрэгжүүлэх журмыг эцэслээгүй байгаатай холбоотой гэсэн тайлбарыг өглөө. Гэхдээ цаг хугацаа алдалгүй гуравдугаар сарын 15-наас бүртгэл эхэлнэ гэж албан ёсоор мэдэгдсэн юм.