Монгол Улс татварын хууль тогтоомжоо иргэдийн амьдралд ойр, энгийн байдлаар өөрчилж эхэлсэн гэж судлаачид хэлж байна. Өнөөдөр энэ талаар судлаачид болон албаны эх сурвалжууд хамтран эрдэм шинжилгээний бага хурал зохион байгуулсан юм. 

Нэмэгдсэн өртгийн албан татварын тухай хууль оны эхнээс хэрэгжиж эхэлсэн. Энэ бол иргэдийн худалдан авсан бараа бүтээгдэхүүнээс шууд авч байгаа хэрэглээний татварын нэг хэлбэр. Өөрөөр хэлбэл, худалдагч иргэн танд хэдэн төгрөгийн  борлуулалт хийснийг худалдан авагчийн зарлагаар хянах боломж бүрдэх юм. Энэ бол далд эдийн засгийг хумих энгийн арга, олон улсад ч ийм тогтолцоог ашигладаг байна. 

Өнөөдрийн байдлаар 35 мянга гаруй тасалбар хэвлэх цэгээс 15 сая 500 мянга орчим тасалбар хэвлэгдсэн. Гэвч цахим системд бүртгүүлсэн нь ердөө 411 мянга байгаа юм. Өөрөөр хэлбэл, иргэдийн дунд татварын боловсрол сул байгаагийн нэг жишээ. НӨАТ-аас гадна хүн амын орлогын албан татвараас буцаан олголт авч болдог. Одоогоор их сургуулийн сургалтын төлбөр, орон сууц худалдан авсан нөхцөлд л хуулийн заалт үйлчилж байгаа ч, цаашдаа боломжууд улам нэмэгдэнэ. Тиймээс татвараа өөрөө тодорхойлон төлөх системийг иргэн бүр ашиглаж сурах нь чухал байгаа юм.

1990 оноос татварын систем бүрдэж эхэлсэн. Хуулийн дагуу татвараа төлөх ёстой гэж албаддаг байсан бол одоо иргэдийн оролцоог нэмэгдүүлсэн, энгийн байхаар хуульчилж байна. Иргэн таны төлсөн татвар Монгол Улсын үндэсний аюулгүй байдлыг хангах үндсэн тулгуурын нэг гэдгийг хүн бүр ойлгох хэрэгтэйг мэргэжилтнүүд онцоллоо.