Ирак Сири дэхь Исламын улс гэж өөрийгөө нэрийдсэн лалын хэт даврагч бүлэглэлийнхтэй хийж буй тэмцэлд амжилт гарч байгаа ч  жихадууд ноцтой аюул дагуулсан хэвээр байна. АНУ-ын Ерөнхийлөгч Барак Обама Пентагонд болсон Үндэсний аюулгүй байдлын зөвлөлийн хуралдааны дараа хийлгэсэн хэвлэлийн бага хурал дээр ийнхүү онцлон мэдэгдсэн  юм.  

Исламын улс бүлэглэлийн эсрэг хийж байгаа цэргийн ажиллагаа үр дүнд хүрч байгааг Ойрхи Дорнод дахь  тус бүлэглэлийнхний байр суурь урьдынх шигээ хүчтэй биш болсон нь батлана гэж Ерөнхийлөгч Обама онцолж байлаа. Гэхдээ лалын хэт даврагчид Ирак  Сирийн хил давж халдлага зохион байгуулахад гол хүчээ төвлөрүүлж байна гэж тэрээр анхааруулсан юм.

Тодруулбал, Франц, Турк, Бангладеш улсуудад террорист халдлага гарах аюул өндөр байгааг тэмдэглэн хэлсэн юм. Мөн АНУ-д  томоохон террорист халдлагаас илүүтэйгээр жижиг бүлгээр эсвэл ганцаар халдлага үйлдэх  магадлал өндөр байна гэж үзэж буйгаа илэрхийлсэн юм.

Үүний зэрэгцээ Америкийн Ерөнхийлөгч жихадууд тун удахгүй Сирийн Ракка, Иракийн Мосул гээд түшиц газруудаа хяналтаасаа алдана гэдэгт итгэлтэй байгаагаа илэрхийлсэн юм.

Мөн лалын хэт даврагчид сүүлийн бүтэн нэг жилийн турш Сири, Иракт өргөн хүрээтэй дайралт хийгээгүй нь хүч нь суларч  байгаагийн бас нэгэн баталгаа гэдгийг тэмдэглэн хэлсэн юм. Мөн Америкийн Ерөнхийлөгч Сирид ОХУ-тай хамтрахад бэлэн гэдгийг  илэрхийлсэн. Гэхдээ ОХУ шаардлагатай алхам хийхийн оронд  Дамаск дахь дэглэмийг дэмжсэн хэвээрээ байгааг сануулж байлаа. 

Түүнчлэн Башар Асадийн засгийн газар болон холбоотнууд нь байлдааны ажиллагааг зогсоох дэглэмийг зөрчсөн хэвээрээ байна хэмээн шүүмжилсэн юм. Түүгээр ч зогсохгүй ОХУ сүүлийн хэдэн 7 хоногийн туршид үүнд нь шууд оролцож байгаа нь хямрал мөргөлдөөнийг зохицуулах хүсэл сонирхолд нь эргэлзэхэд хүргэж байна хэмээн мэдэгдсэн юм.