Японы Ерөнхий сайд Шинзо  Абэ  ирэх  сард  Куба  улсад айлчлахаар  төлөвлөж байгаа талаар "Киодо"  агентлаг Засгийн газрын эх сурвалжид тулгуурлан мэдээллээ. 

Хэрэв Японы Ерөнхий сайд Кубад айлчилвал  энэ нь  тус улсын  удирдагчийн  эрх  чөлөөний аралд  хийж  буй  анхны албан ёсны  айлчлал болох юм. Мөн хоёр орны харилцаа хамтын ажиллагааг  бэхжүүлэх арга зам, Японы  компаниудын  Кубын аж үйлдвэрийн салбарт  хөрөнгө оруулах боломжийн талаар хэлэлцэнэ гэж хэвлэлүүд мэдээлж байна.   

Ирэх есдүгээр сарын  сүүлчээр  Нью-Йорк  хотноо НҮБ-ын Ерөнхий ассамблейн  71 дүгээр чуулган  болох юм.   Японы  Ерөнхий сайд  энэ арга хэмжээнд оролцохын хамтаар  Кубад айлчлахаар төлөвлөж байгаа аж. Өнгөрсөн онд  АНУ, Куба улс харилцаагаа сэргээж эхэлснээс хойш  олон улс орон  Кубатай харилцаа тогтоож, хамтын ажиллагаагаа өргөжүүлэхийг  сонирхох болсны нэг нь Япон улс юм.   Япон улс нь Кубыг хөрөнгө оруулалт хийх,  эдийн засгийн харилцаагаа  өргөжүүлэх  таатай улс орны нэг  гэж  үздэг байна.

2015 оны  тавдугаар сард  Кубад  Японы Гадаад хэргийн сайд Фумио Кисида  айлчилж байсан бөгөөд  энэ нь  Японы Гадаад хэргийн сайдын  Кубад хийсэн анхны айлчлал  болж байсан билээ.